Tarazda joǵary laýazymdy polıtsııa qyzmetkerlerine qatysty sot aıaqtalýǵa jaqyn

Taraz qalasynyń № 2 sotynda Jambyl oblysy polıtsııa departamenti bastyǵynyń burynǵy orynbasary Jaıdarbek Quttybaev pen Talas aýdandyq polıtsııa bóliminiń burynǵy ýaqytsha bastyǵy Erken Abaevqa qatysty is boıynsha sot protsesi sońǵy kezeńge jetti.

Memlekettik aıyptaýshy Jaıdarbek Quttybaevty 6 jylǵa, Erken Abaevty 5 jylǵa bas bostandyǵynan aıyrýdy surady. Sonymen qatar prokýror sottalýshylardy arnaýly ataqtarynan aıyryp, bolashaqta quqyq qorǵaý organdarynda qyzmet atqarý quqyǵynan aıyrýdy usyndy.

Jaıdarbek Quttybaevqa QR Qylmystyq kodeksiniń 190-baby 3-bóliginiń 1 jáne 2-tarmaqtary boıynsha (qyzmettik jaǵdaıyn paıdalana otyryp, memlekettik fýnktsııalardy oryndaýǵa ýákiletti adamnyń iri mólsherde jasaǵan alaıaqtyǵy) aıyp taǵylǵan.

Al Erken Abaevqa QK-niń 28-babynyń 5-bóligi jáne 367-babynyń 2-bóligi boıynsha (eleýli mólsherde para berýge járdemdesý) aıyp taǵylyp otyr.

Іs materıaldaryna sáıkes, jábirlenýshi retinde Qarataý qalasynda qyzmet atqarǵan burynǵy polıtsııa qyzmetkeri tanylǵan. Dál osy adamnyń oqıǵasy keıin onyń basshylaryna qarsy qylmystyq istiń bastalýyna sebep bolǵan. Atalǵan qyzmetker bir adamdy soqqyǵa jyqqannan keıin oǵan qylmystyq is qozǵalyp, ishki ister organdarynan jumystan shyǵarylý qaýpi tóngen. Sol kezde Talas aýdandyq polıtsııa bóliminiń sol kezdegi ýaqytsha bastyǵy Erken Abaev máseleni Jambyl oblysy polıtsııa departamenti bastyǵynyń orynbasary Jaıdarbek Quttybaev arqyly sheshýdi usynǵan. Munyń quny 5 mln teńge bolǵan.

Tergeý nusqasy boıynsha, bul qarajat polıtsııa qyzmetkeriniń shenin saqtap qalyp, qylmystyq jaýapkershilikten tolyqtaı qutylýyna kómektesýi tıis bolǵan. Alaıda qandaı da bir sebeptermen isti jabý múmkin bolmaǵan.

Soǵan qaramastan is sotqa deıingi tergep-tekserýge ótip, keıin polıtsııa qyzmetkeri qamaýǵa qamaldy. Osydan soń ol óz máselesin sheshý úshin aqsha bergenin quqyq qorǵaý organdaryna habarlaǵan.

Aldymen kadr máseleleri jónindegi polıtsııa departamenti bastyǵynyń burynǵy orynbasary Jaıdarbek Quttybaev ustaldy. Іshki ister mınıstriniń 2025 jylǵy 29 tamyzdaǵy buıryǵymen ol qyzmetten teris sebeptermen bosatylǵan. Keıin osy is boıynsha Erken Abaev ta qamaýǵa alyndy. Ol ustalǵanǵa deıin izdeýde júrgen.

Sot protsesi bıylǵy aqpanda bastaldy. Aldyn ala tyńdaýda qorǵaýshylar isti toqtatýdy nemese ony prokýrorǵa qaıtarýdy surap, tergeý barysynda zań buzýshylyqtarǵa jol berilgenin alǵa tartqan. Alaıda sot bul ýájdermen kelispeı, negizgi sot talqylaýyn taǵaıyndady.

Qazir protsess aıaqtalýǵa jaqyn. Kelesi aptada sottalýshylarǵa sońǵy sóz aıtý quqyǵy beriledi. Odan keıin sot úkim shyǵarý úshin keńesý bólmesine ketedi.

Buǵan deıin Aqtóbede para alǵan polıtsııa qyzmetkerleri sottalǵanyn jazǵanbyz. Ekeýi de temirjoldaǵy tártipke jaýapty bolǵan.