Tarazda joǵalyp ketken 10 jastaǵy balanyń máıiti tabyldy
TARAZ. QazAqparat - Tarazda joǵalyp ketken 10 jastaǵy balanyń máıiti tabyldy, dep habarlaıdy «QazAqparat» HAA Jambyl oblysy ІІD-iniń baspasóz qyzmetine silteme jasap.
Birneshe kún boıy aqparattyq arnalar men áleýmettik jeliler arqyly Taraz qalasyndaǵy №6 mekteptiń 4-synyp oqýshysy Nıkolaı Nıkıtıýktiń 18 qarasha kúni saǵat 17:00 kezinde Saharnyı aýylyndaǵy stadıonnan shyqqany, alaıda úıine oralmaǵany týraly aqparat taraǵan bolatyn.
Ata-anasy bala týraly qandaı da bir aqparat biletinder bolsa, kórsetilgen baılanys telefondaryna jiberýin ótingen.
«Taraz qalasy turǵynynyń málimetinshe, onyń uly 2007 jyly týǵan, 18 qarasha kúni úıinen shyǵyp ketip, qaıtyp oralmaǵan. Polıtsııa qyzmetkerleri sotqa deıingi tergeý amaldaryn bastap, izdeý sharalary uıymdastyryldy. Kelesi kúni ІІB qyzmetkerleri jedel-izdestirý sharalary barysynda butalardyń arasynan balanyń denesin tapty», - dep málim etti Jambyl oblysy ІІD-iniń baspasóz qyzmeti.
Tergeý barysynda qaza tapqan balanyń 14 jastaǵy dosy qasynda bolǵany anyqtaldy. Ol sol kúni ekeýiniń jelim ıiskegenin aıtty.
«Balanyń qaıtys bolý sebebin anyqtaý úshin sot-medıtsınalyq saraptamasy taǵaıyndaldy. Іstiń jaı-japsary anyqtalyp jatyr. Qazirgi ýaqytta kúdikti ata-anasyna berildi», - dedi Jambyl oblystyq ІІD.
