Tarazda jer silkinisiniń saldary anyqtalýda
TARAZ. QazAqparat - Taraz qalasynyń turǵyndary Aýǵanstanda bolǵan jer silkinisin sezindi, dep habarlaıdy «QazAqparat» HAA tilshisi.
Oqıǵaǵa kýá bolǵandardyń aıtýynsha, joǵary qabattarda turatyn úılerde lıýstralar qozǵalyp, jıhazdar ornynan jyljyǵan. Qalanyń keıbir aýdandarynda jerasty dúmpýin kóshedegi adamdar da sezingen.
«Jer silkinisi saǵat 13.10-da boldy. Almaty seısmologııa ınstıtýtynyń aqparatyna súıensek, zilzala oshaǵy Aýǵanstanda bolǵan. Bizde dúmpýler 3 balǵa deıin jetti», - dedi «QazAqparat» HAA tilshisine telefon arqyly oblystyq TJD basshysy Baǵdat Danılov.
Oblystyq TJD basshysynyń orynbasary Talǵat Sabyrovtyń aıtýynsha, qazir zilzaladan kelgen qandaı da bir shyǵyndardyń bar-joǵy anyqtalýda. «Ázirge jer silkinisinen zardap shekkender men búlingen ǵımarattar týraly aqparat tirkelgen joq», - dedi ol.
TJD sonymen qatar Jambyl oblysy seısmıkalyq qaýiptiligi segiz balǵan deıin jetetin aýmaqta turǵanyn eske salyp ótti. Seısmoqaýipti aımaq oblystyń barlyq tarrıtorııasynyń 22 paıyzyn alyp jatyr. Al munda halyqtyń 70 paıyzy turyp jatyr jáne negizgi kólik magıstraldary men óndiris oryndarynyń 85 paıyzy ornalasqan.
Eske sala keteıik, Eýropalyq Jerorta teńizi seısmologııalyq ortalyǵy saıtynyń málimetinshe Aýǵanstandaǵy zilzala kúshi 6,1 balǵa jetken.
