Tarazda jer alyp berem degen jeleýmen turǵyndardyń 11 mln teńgesin alǵan alaıaqtar ustaldy
TARAZ. QazAqparat – Tarazdyq polıtseıler toptasyp jumys jasaıtyn alaıaqtardy quryqtady,- dep habarlaıdy QazAqparat tilshisi.
Taraz qalasynyń Polıtsııa basqarmasy 1-shi polıtsııa bóliminiń kezekshi bólimine jergilikti bes turǵyn oryn alǵan alaıaqtyq deregi boıynsha shaǵymmen júgingen.
Barlyq jábirlenýshiler beıtanys adamdardyń ózderiniń senimderine kirip, olarǵa jer ýchaskelerin tómen baǵamen satyp alýǵa kómektesýge ýáde bergenin jetkizgen. Alaıaqtar olardyń aqshalaryn aldaý jolymen ıemdengen desek, jalpy materıaldyq shyǵyn kólemi on bir mıllıonnan asady.
«Jedel-izdestirý is-sharalaryn júrgizý barysynda Taraz qalasynyń Polıtsııa basqarmasy 2-polıtsııa bólimi krımınaldyq polıtsııa bólimshesiniń qyzmetkerleri atalǵan alaıaqtyq deregin jasady degen kúdikpen 46 jastaǵy áıel men 24 jastaǵy jigitti anyqtap, ustady. Kúdiktilerdiń ekeýi de jasaǵan qylmystaryn moıyndady»,-delingen oblystyq PD baspasóz qyzmetiniń habarlamasynda.
Kúdiktilerge qatysty Qazaqstan Respýblıkasy Qylmystyq kodeksiniń 190-babynyń 3-bóligi «Alaıaqtyq» boıynsha sotqa deıingi tergeý amaldary bastaldy. Sondaı-aq, ustalǵan kúdiktilerdiń basqa da osyndaı uqsas qylmystarǵa qatystylyǵy tekserilýde.
