Tarazda jemqorlyqqa qarsy kóshpeli sýret kórmesi ashyldy

TARAZ. QazAqparat – Taraz qalasyndaǵy «Kóne Taraz» tarıhı-etnomádenı ortalyǵynyń kórkemsýret galereıasynda belgili sýretshi, Qazaqstannyń sýretshiler jáne dızaınerler odaǵynyń múshesi Saǵı Ahtanovtyń «Jemqorlyq indet – alastaý mindet» atty plakat kórmesi ashyldy, dep habarlaıdy QazAqparat.

Kórmeniń ashylý saltanatynda Sybaılas jemqorlyqqa qarsy is-qımyl agenttiginiń oblys boıynsha departament basshysynyń birinshi orynbasary Ravıl Tólebaev sóz alyp, qoǵamdaǵy keleńsizdikterdi, jemqorlyqqa aparatyn qadamdardy sýret tilimen áshkerelep júrgen Saǵı Ahtanovtyń búgingi ǵajaıyp kórmesi úshin alǵysyn bildirip, is-sharaǵa sáttilik tiledi.

Jazýshy, oblystyq «Aq jol» gazetiniń bas redaktory Kósemáli Sáttibaıuly kópshiliktiń erekshe kórmege jınalyp otyrǵanyn aıtyp, osyndaı kórmeler kóbirek ótse degen tilegin bildirdi. Sondaı-aq ol S.Ahtanovtyń sheberligine, jemqorlyq sıpatyn nasıhattaýdaǵy tapqyr sheshemiderine toqtalyp, sýretshiniń «Mór bar, bas joq», «Alma pisse, aýzyma tússe», «Nesıe» sýret-plakattardyń kórermenge qandaı oı salatynyn taldap aıtyp berdi.

Kórme avtory Saǵı Ahtanov jyljymaly kórmesin kórsetý úshin Tarazǵa arnaıy kelgenin aıtady. Ol osylaısha qoǵamdaǵy eń ózekti másele jemqorlyq taqyrybymen kópke oı salǵysy kelgen. Sondyqtan osyndaı múmkindik berip otyrǵan uıymdastyrýshylarǵa aıtar alǵysy da sheksiz.

Jıynda oblys ákimdigi mádenıet, arhıvter jáne qujattama basqarmasy basshysynyń Alǵys hatyn sýretshige atalǵan basqarma basshysynyń orynbasary Lesbek Amalov tapsyryp, qurmet kórsetti. Budan soń kópshilik úlken zalǵa qoıylǵan plakat-kórmeni tamashalady. Bul jerge júzden astam týyndy qoıylǵan. «Bas ornyna judyryq», «Jemqorlyq tizbegi», «Kredıt – qaryz qarmaǵy», «Qazannan qaqpaq ketse…», «Bıýdjet», «Aqshań bar ma?» kartınalary bar.

Aıta keteıik, kóshpeli sýret kórmesi birneshe kún tarazdyqtar nazaryna usynylady. Odan keıin Túrkistan oblysyna jol tartady.