Tarazda jeke sot oryndaýshysy 1,1 mln teńgeni jymqyrǵany úshin sottaldy
ASTANA. KAZINFORM – Taraz qalasynyń prokýratýrasy júrgizgen tekserý barysynda jeke sot oryndaýshysynyń memleket pen bank uıymdarynyń paıdasyna aýdarylýy tıis 1,1 mln teńgeni jymqyrý faktisi anyqtaldy.
Prokýratýra málimetinshe, tekserý jeke sot oryndaýshylarynyń depozıttik shottaryna túsken qarajattyń qozǵalysyna júrgizilgen.
Anyqtalǵandaı, sot oryndaýshysy úsh boryshkerden óndirilgen aqshany óziniń jeke shotyna aýdaryp, ony jeke qajettiligine jumsaǵan. Sonyń saldarynan atalǵan atqarýshylyq is júrgizýler aıaqtalmaı, bereshek ótelmegen.
– Osy fakt boıynsha 2025 jylǵy 29 sáýirde QR Qylmystyq kodeksiniń 251-babynyń 2-bóligi boıynsha qylmystyq is tirkeldi. Taraz qalasynyń №2 sotynyń 2026 jylǵy 23 maýsymdaǵy úkimimen jeke sot oryndaýshysy kináli dep tanylyp, oǵan eki jylǵa bas bostandyǵyn shekteý jazasy taǵaıyndaldy. Sondaı-aq ol úsh jyl merzimge jeke sot oryndaýshysy qyzmetimen aınalysý jáne atqarýshylyq is júrgizýge, sot aktilerin oryndaýǵa baılanysty laýazymdardy atqarý quqyǵynan aıyryldy, – delingen prokýratýra habarlamasynda.
Sonymen qatar sottalǵan adam raqymshylyq jasaý týraly aktiniń negizinde negizgi jazasyn óteýden bosatyldy. Úkim zańdy kúshine engen.
Prokýratýra taǵy bir jeke sot oryndaýshysyna qatysty da qylmystyq is tirkelgenin habarlady.
– 2026 jylǵy 17 mamyrda 23 boryshkerden óndirilgen 8,2 mln teńgeni óndirip alýshylarǵa aýdarmaý faktisi boıynsha QR Qylmystyq kodeksiniń 251-babynyń 2-bóligimen qylmystyq is tirkeldi. Qazirgi ýaqytta sotqa deıingi tergep-tekserý jalǵasyp jatyr, – dep málimdedi prokýratýra.
Aıta keteıik, Jambyl oblysynda ákimshilik daýlardyń úshten biri sot oryndaýshylaryna qatysty.
