Tarazda jastar arasyndaǵy qylmyspen kúres máselesi qaraldy

TARAZ. QazAqparat - Jambyl oblysynyń prokýrory N.M. Ábdirovtyń tóraǵalyǵymen M.H. Dýlatı atyndaǵy Taraz óńirlik ýnıversıtetinde jastar arasynda qylmystyń aldyn alýdyń tıimdiligin arttyrý máseleleri boıynsha vedomstvoaralyq keńes ótti, dep habarlaıdy QazAqparat prokýratýraǵa silteme jasap.

Keńeske polıtsııa departamentiniń bastyǵy J.Súleımenov, oblys ákiminiń orynbasary D. Káribek, joǵary oqý ornynyń rektory E. Ámirbekov, ýákiletti organdardyń, sondaı-aq ata-analar komıtetteri men úkimettik emes uıymdardyń ókilderi qatysty.

Keńes barysynda jasóspirimder qylmysynyń aldyn alý salasynda, konsýltatıvtik keńes sheńberinde júrgizilip jatqan jumystar baıandalyp, negizgi problemalyq máseleler anyqtaldy.

Oblys prokýrory kámeletke tolmaǵandarǵa qatysty jasalǵan quqyq buzýshylyqtardyń ósýi, jastar toptarynyń qatysýymen jasalǵan qylmys faktileri, sondaı-aq quqyq qorǵaý organdarynyń ýákiletti organdarmen jáne oqý oryndarymen ózara is-qımylynyń jetkiliksizdigi týraly atap ótti.

Qylmystar jasalǵan jaǵdaıda jedel den qoıý jáne olarǵa yqpal etken sebepter men jaǵdaılardy joıý jónindegi is-sharalardy júzege asyrý boıynsha bekitilgen Algorıtm sheńberinde mobıldi toptardyń jumysyndaǵy tásilder maquldandy.

Keńes qorytyndysy boıynsha ýákiletti organdardyń osy baǵyttaǵy jumysyn kúsheıtý, oblys ákimdigi janyndaǵy kámeletke tolmaǵandardyń isteri jónindegi komıssııanyń rólin kúsheıtý, sondaı-aq vedomstvoaralyq ózara is-qımyl boıynsha usynystar ázirlendi.