Tarazda jasóspirimder qaýipsizdigine arnalǵan Aimap Kids jobasy iske qosyldy
ASTANA. KAZINFORM — Búgingi tańda joba qaladaǵy 79 mektepti qamtıdy.
Kámeletke tolmaǵandar arasyndaǵy quqyq buzýdyń aldyn alý maqsatynda Taraz qalasy prokýratýrasynyń bastamasymen aqparattyq keńistikti taldaýǵa jáne yqtımal táýekelderdi erte anyqtaýǵa baǵyttalǵan jasandy ıntellekt tehnologııalaryna negizdelgen «Aimap Kids» jobasy iske asyrylyp jatyr.
Búgingi tańda joba qaladaǵy 79 mektepti qamtıdy.
Jobanyń negizgi mindeti — destrýktıvti kontenttiń taralýyn ýaqtyly anyqtaý, yqtımal táýekel toptary men jaǵymsyz úgit-nasıhat kózderin aıqyndaý, sondaı-aq ataýly profılaktıkalyq sharalar qabyldaý.
— Júıe ınternet keńistigindegi ashyq derekterdi sýıtsıdtik kórinister men depressııalyq jaǵdaılar, lýdomanııa, seksýaldyq aýytqýlar, zııandy zattardy qoldaný jáne zorlyq-zombylyq sııaqty negizgi táýekel baǵyttary boıynsha taldaıdy.
Alynǵan derekter negizinde destrýktıvti kontenttiń taralýynyń negizgi úrdisterin, onyń kózderin jáne atalǵan kontenttiń yqpalyna neǵurlym beıim paıdalanýshylar sanattaryn anyqtaýǵa múmkindik beretin taldamalyq materıaldar qalyptastyrylady, — delingen Jambyl oblysynyń prokýratýrasy habarlamasynda.
Alynǵan nátıjeler profılaktıka sýbektileri — prokýratýra, polıtsııa jáne jergilikti atqarýshy organdar, sondaı-aq qoǵamdyq uıymdar tarapynan ataýly profılaktıkalyq jumysty uıymdastyrý úshin paıdalanylady.
Pılottyq jobany 2026 jyldyń sońyna deıin iske asyrý josparlanǵan. Joba qorytyndysy boıynsha qabyldanǵan profılaktıkalyq sharalardyń tıimdiligi baǵalanyp, kámeletke tolmaǵandar úshin qaýipsiz aqparattyq ortany qamtamasyz etýge baǵyttalǵan tsıfrlyq quraldardy odan ári damytý jáne aýqymyn keńeıtý múmkindikteri aıqyndalatyn bolady.
Aıta ketelik Qazaqstanda jumys berýshiler qyzmetkerlerine kıberqaýipsizdikti oqytýǵa mindetteledi.
