Tarazda jasóspirim TikTok-taǵy vıdeo úshin tanysyna pyshaq saldy
TARAZ. QazAqparat – Taraz qalasynda jasóspirimder TikTok jelisindegi vıdeo úshin bir-birine pyshaq ala júgirgen, dep habarlaıdy QazAqparat Polisia.kz portalyna silteme jasap.
15 tamyz kúni 15 jáne 17 jastaǵy jasóspirimder arasynda janjal týyndaǵan. Polıtsııa qyzmetkerleriniń anyqtaýy boıynsha, janjalǵa jigit pen qyz birlesip túsken rolık sebep bolyp, ony janjal shyǵarýshy qyzǵanǵan.
Úshinshi jasóspirim tanystardy ajyratpaq bolǵan kezde pyshaqtan jaraqat alǵan. Ol oblystyq balalar aýrýhanasyna jetkizildi.
Zardap shekken jigittiń aıtýynsha, oǵan pyshaq jaraqatyn salǵan janjaldy bastaǵan jasóspirim eken. Ol istegen áreketi úshin jaýapkershilikten jaltaryp, izin sýytqan.
Taraz qalasynyń polıtsııa basqarmasy QR QK 293-baby 3-tarmaǵy «Buzaqylyq» boıynsha qylmystyq is qozǵady.
Qazirgi ýaqytta jedel-tergeý toby ustalǵan 15 jasar Taraz turǵynyna qatysty qajetti sharalardy júrgizip jatyr. Oqıǵanyń jaı-japsary belgili bolǵannan keıin bultartpaý sharasy anyqtalady.
