Tarazda jas ǵalymdar bas qosty
ASTANA. QazAqparat - Taraz memlekettik pedagogıkalyq ınstıtýtynda bilim ordasynyń 50 jyldyǵyna arnalǵan «Jas ǵalym 2017» atty halyqaralyq ǵylymı-praktıkalyq konferentsııa ótti. Altynshy ret uıymdastyrylǵan alqaly jıynǵa 400-den astam jas daryn qatysty, dep habarlaıdy QazAqparat TarMPI-dyń Aqparattyq-ımıdjdik qyzmetine silteme jasap.
Taraz memlekettik pedagogıkalyq ınstıtýtynyń Tárbıe isi jáne áleýmettik máseleler jónindegi prorektory Orynqyz Joldasova ınstıtýt rektory Darııa Qojamjarovanyń konferentsııaǵa qatysýshylarǵa joldaǵan quttyqtaý hatyn oqyp berdi.
«Memleket basshysy Nursultan Nazarbaev elimizdi ǵylymı-ınnovatsııalyq salada zor serpilis jasap, Eýrazııalyq keńistikte osy salada kóshbasshylardyń biri bolýdy mindettedi. Qazirgi kúnde jan-jaqty damyǵan ǵylymsyz órkenıetti memleketterdiń qataryna qosylý múmkin emes ekeni barshaǵa belgili aqıqat. Sizder sol ǵylym áleminde baq synap júrgen jas urpaqtyń ókilderisizder. Týrasyn aıtsaq, sizderdiń bolashaqtaryńyz eldiń bolashaǵy, ulttyń erteńi. Aldymyzǵa qoıyp otyrǵan bul mindetter asa aýqymdy. Ol úshin bárimizge úlken kúsh-qaırat, erik pen jiger kerek. Bastysy bilim men ǵylym kerek. Qazaqstan ekonomıkasynyń ózegi bilim men ǵylymǵa negizdelýi qajet. Sonda ǵana josparymyz oryndalyp, kózdegen maqsat údesinen shyǵatynymyzǵa senimdimiz», - delingen rektor quttyqtaýynda.
Konferentsııanyń basty maqsaty - jas ǵalymdardyń jasampazdyq áleýetin damytý, olardy zamanaýı ǵylymnyń mańyzdy máselelerin sheshýge belsendi túrde tartý, ǵylymı bilim berý keńistigin damytý. Sondaı-aq, jıynnyń taǵy bir kózdegeni - izdenýshilerdiń ózara baılanys ornatýlaryna, tájirıbe almasýlaryna yqpal jasaý. Bıylǵy konferentsııa gýmanıtarlyq jáne jaratylystaný ǵylymdary sektsııalary boıynsha ótkizildi. Atalǵan sektsııalar boıynsha barlyǵy 500-den astam jumys kelip túsken. Shara barysynda qazaqstandyq jas izdenýshilerdiń ǵylymı jetistikteriniń kórmesi ótkizilip, otandyq jáne sheteldik ǵalymdardyń jastarǵa arnalǵan sheberlik synyptary júrgizildi.
Konferentsııaǵa kelip túsken materıaldar negizinde arnaıy jınaq shyǵarý kózdelip otyr. Bul óz kezeginde elimizdegi izdenýshi jastarǵa, ǵylymı jumystarmen aınalysatyn ǵalymdarǵa jáne ınnovatsııalyq damý strategııasyn josparlap, júzege asyrýshylar úshin mańyzdy teorııalyq jáne ádistemelik kómekshi qural bolmaq.
