Tarazda jappaı tártipsizdikterge 2 myńǵa jýyq adam qatysqan

TARAZ. QazAqparat – Tarazda apparat keńesi ótip, onyń barysynda QR Prezıdentiniń ózekti problemalardy sheshý boıynsha bergen naqty tapsyrmalary qaraldy. Bul týraly QazAqparat tilshisi habarlaıdy.

«Zardap kelgen nysandardy qalpyna keltirý boıynsha naqty tapsyrmalar berildi. Qurylys jumystarynyń sapasyn qadaǵalaýdy, komendanttyq saǵat talaptarynyń oryndalýyn qamtamasyz etý qajet», - dedi oblys ákimi Berdibek Saparbaev.

Óńir basshysy jappaı tártipsizdikterge 2 myńǵa jýyq adam qatysqanyn atap ótti. Qazirgi ýaqytta 269 arańdatýshy ustaldy.

«Qoǵamdyq tártip buzýshylaryn anyqtaý operatsııasyn jalǵastyrý kerek. Bul baǵytta aýdandar men aýyldar ákimdikteri, polıtsııa qyzmetkerleri tyǵyz jumys isteýi tıis. Óńirdegi ahýalǵa qatysty aqparat kúndelikti jańartylyp otyr, olarǵa óńirlik shuǵyl shtabtyń otyrystarynda taldaý jasalady», - dedi B.Saparbaev.

Jambyl oblysynyń basshysy kommýnaldyq qyzmetterdiń jumysy irkilissiz bolýyn talap etti.

«Prezıdent kommýnaldyq tarıfter, benzın, gaz, azyq-túlik baǵalarynyń baǵasyn retteý boıynsha naqty tapsyrma júktedi. Azyq-túliktiń qajetti qoryn qamtamasyz etý qajet», - dedi Berdibek Saparbaev óziniń orynbasarlary men basqarmalar basshylaryna qarata.