Tarazda Jańa jyl túninde eki iri órt boldy
TARAZ. KAZINFORM - Aldymen Qarasý shaǵynaýdanyndaǵy kópqabatty turǵyn úıde órt shyqsa, keıin janarmaı quıý beketine jaqyn ornalasqan meıramhana otqa orandy.
Alǵashqy órt oqıǵasy 22:18-de Qarasý shaǵynaýdanyndaǵy №15 besqabatty turǵyn úıde tirkeldi. Besinshi qabattaǵy páterdiń balkonynda tutanǵan ot kóp uzamaı shatyrǵa taralǵan. Alǵashqy órt sóndirý bólimsheleri kelgen kezde balkon men shatyr ashyq jalynmen janyp jatqan. Jalpy aýmaǵy shamamen 900 sharshy metr órt 23 mınýttan keıin sóndirildi.
Úıden 100 adam, onyń ishinde 30 bala evakýatsııalandy. Órtti sóndirýge jeti sý atqysh jumyldyryldy. Turǵyndarǵa №25 orta mektep bazasynda jylytý jáne tamaqtaný pýnkti uıymdastyryldy.
Qala ákimdiginiń málimetinshe, alǵashqy saǵattarda ol jerge eshkim kómekke júginbegenimen, keıinirek toǵyz otbasy ýaqytsha ornalastyrý boıynsha járdem suraǵan.
Ekinshi órt Jambyl dańǵylynda ornalasqan «Dr. Watson» meıramhanasynda boldy. Órt meıramhananyń jazǵy alańyn sharpyǵan, al negizgi ǵımaratta kelýshiler bolǵan. Órt oshaǵynyń janarmaı quıý stantsııasyna óte jaqyn ornalasýy da qaýip týdyrǵan.
Meıramhanadan shamamen 100 adam evakýatsııalandy. Órt sóndirýshiler tilsiz jaýdyń negizgi ǵımaratqa jáne janarmaı quıý beketine taralýyna jol bermedi. Órt aýmaǵy – shamamen 300 sharshy metr.
Jambyl oblysynyń Tótenshe jaǵdaılar departamentiniń málimetinshe, eki oqıǵada da zardap shekkender joq. Áleýmettik jelilerde kýágerler órttiń shyǵýyna salıýt sebep bolýy múmkin degen boljam aıtqanymen, TJD ókilderi naqty qorytyndy jasaýǵa áli erte ekenin atap ótti.
Mamandardyń aıtýynsha, órttiń naqty sebebi qajetti saraptamalar aıaqtalǵannan keıin, shamamen 10-15 kún ishinde anyqtalady.
Ótken táýlikte, 31 jeltoqsanda, Qazaqstan TJM kúshteri 210 ret shaqyrtýǵa shyqqan, onyń 91-i órt pen janý jaǵdaılaryna qatysty.
Aıta keteıik, bir jyl ishinde elimizde 150 jańa erikti órt sóndirý pýnkti ashyldy.