Tarazda jańa telearna ashyldy

TARAZ. QazAqparat – Jambyl oblysy Taraz qalasynda «Taraz24» kommertsııalyq telearnasy kórermenge jol tartty, dep habarlaıdy QazAqparat tilshisi.

Jambyl oblysynda «Taraz24» kommertsııalyq telearnasy tusaýyn kesti. Aqparattyq baǵyttaǵy telearnada osy salada talaı jyldyq tájirıbesi bar mamandar men kreatıvti jastar toptasty.

Telearna táýlik boıy, ıaǵnı 24 saǵat habar taratady. Zamanaýı tehnıkalarmen jabdyqtalǵan jańa arnanyń kez kelgen jerden aqparatty tikeleı taratýǵa múmkindigi bar. Álemdegi, respýblıkadaǵy, oblystaǵy jańalyqtardy úzdiksiz beretin bolady. Bul týraly «Taraz24» telearnasy dırektorynyń orynbasary Danııar Álimqul aıtyp berdi.

«Telearna 30-ǵa jýyq jobamen ashylyp otyr. Olardyń qatarynda habarlar men aralyq habarlar bar. Ereksheligi hronometrajy uzyn-sonar emes, ıaǵnı kórermenniń altyn ýaqytyn almaý maqsatynda qysqa ýaqyt ishinde kórsetiledi. Basqarma basshylarymen ashyq suqbat alańyna aınalatyn «Kabınet», kórsetilgen qyzmet pen jasalǵan jumystyń sapasyn anyqtaıtyn «Sapa», ata-ananyń qadirin sezindirip, qurmet kórsetetin «Meıirim mekeni», qylmystyq oqıǵalar men óńirdegi tótenshe jaǵdaılardy tizbekteıtin «Regıon 08», sport sańlaqtarynyń jetistigin jarııa etetin «Sportmeıker» syndy aýqymdy habarlar kórermenge jol tartady»,-deıdi D.Álimqul.

Sonymen qatar, jańa telearna «Táýelsizdik shejiresi», «TarazLike», «Aqyl-tegin», «Búginnen basta», «TOP 5: ǵalam ǵajaıyptary», «Búgingi leksıkon», «Dástúr men ǵuryp» syndy aralyq habarlar jambyldyqtardyń nazaryna usynbaq. Telearnanyń ashylýy arqyly 20-dan asa adamdy jumyspen qamtylyp otyr.