Tarazda jańa shaǵyn aýdandar salynady
TARAZ. QazAqparat - Tarazda jańa shaǵyn aýdandar salynady, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Oblys ákiminiń orynbasary Ǵalymjan Ábdiraıymovtyń qatysýymen ótken qala qurylysyna qatysty jıynda salynatyn jańa aýdandar máselesi kóterildi.
Jańa 14 jáne 15-inshi shaǵyn aýdandar oblys ortalyǵyna jańasha sáýlettik kórik berip tur. 14-inshi shaǵyn aýdan avtovokzal aýdanynda, al 15-inshi Súleımenov kóshesiniń sońynda ornalasady.
«Jalpy alǵanda, 350-ge jýyq kóp qabatty turǵyn úı qurylysy josparlanǵan. Sondaı-aq, medıtsınalyq, sporttyq, bilim jáne qoǵamdyq nysandardyń qurylysy júzege asyrylmaqshy», - delingen habarlamada.
Naqty josparlar jobasyna sáıkes, 14 shaǵyn aýdanynyń aýmaǵynda oıyn-saýyq saýda ortalyǵy men sporttyq-saýyqtyrý kesheni, balabaqsha, jalpy bilim beretin mektep, balalardy ońaltý ortalyǵy, emhana, 200 oryndyq onkologııalyq dıspanser, eki dıagnostıkalyq ortalyq, qonaq úıler, keńseler men meıramhanalar, jıhaz jáne qurylys gıpermarketteri, «Barlyǵy úıge arnalǵan» dúkeni, neke saraıy, alańdar men saıabaqtar, qoǵamdyq kólik aıaldamasy, demalý men serýendeýge arnalǵan jaǵajaı salynbaqshy.
Budan ózge, bolashaqtaǵy 15-inshi shaǵyn aýdany ornynda tıptik jobalar boıynsha jeke turǵyn úı qurylystary úshin 922 jer ýchaskesi bólingen. Árbir jeke turǵyn úıdiń aýdany 125,116 jáne 80 sharshy metrdi quraıdy. Qazirdiń ózinde ınjenerlik jeliler men kelesi jyly paıdalanýǵa beriletin 80 páterli jeti turǵyn úıdiń qurylysy bastalyp ketti.
Otyrys barysynda 32,7 myń adamnan turatyn turǵyndar úshin eki órt sóndirý deposyn salý qarastyrylǵandyǵy aıtyldy.
Jyl saıyn oblys ortalyǵynyń ǵana emes Jańatas sııaqty shaǵyn qalalardyń da ınjenerlik-kommýnıkatsııalyq ınfraqurylymdary jańartylyp otyrady.
«EvroHım» halyqaralyq mıneraldy-hımııalyq kompanııasynyń paıda bolýy kenshiler qalasynyń ómirin jandandyrdy. Kelesi jyldan bastap qaladaǵy jartylaı buzylǵan jáne qaraýsyz qalǵan ǵımarattardy qaıta óńdeý jumystary qolǵa alynyp, temirjol stantsııasy aýmaǵynda logıstıkalyq ortalyq qurý, saýda ortalyǵyn ashý josparlanyp otyr. Nátıjesinde turǵyndar sanyn arttyrý da kózdelgen.
Oblystyq qala qurylysy keńesiniń músheleri Taraz qalasynyń basty damý josparyn túzetý máselelerin talqylady.
