Tarazda jalǵan PTR anyqtama jasap satqan emhana medqyzmetkeri ustaldy
TARAZ. QazAqparat - Tarazda PTR test anyqtamasyn qoldan jasaǵan medqyzmetker ustaldy, dep habarlaıdy QazAqparat.
Jambyl oblysynyń polıtsııa departamenti PTR test pen vaktsınatsııa pasportyn qoldan jasaǵandardy anyqtaý maqsatynda is-sharalar keshenin júrgizip jatyr.
Sonyń aıasynda PTR testiń teris nátıjesi bar anyqtamany qoldan jasaǵan emhana qyzmetkeri ustaldy.
Búgingi tańda Qylmystyq kodekstiń 385-baby 1-bólimi boıynsha tergeý júrip jatyr.
26 jastaǵy medqyzmetker jalǵan qujat jasaǵany úshin aqsha almaǵanyn jáne bul jaǵdaı birinshi márte bolyp otyrǵanyn málimdedi. Onyń sóziniń ras-ótirigi tergeý kezinde anyqtalady.
Al osy anyqtamany qoldanǵan 47 jastaǵy áıeldiń ústinen QK 385-baby 3-bólimi boıynsha qylmystyq is qozǵalǵan.
Eske sala keteıik, Qazaqstanda jalǵan qujat jasaǵandarǵa - 4 jylǵa deıin bas bostandyǵynan aıyrý, al ony qoldanǵandarǵa - 40 táýlikke deıin qamaý jazasy qarastyrylǵan.
