Tarazda zańsyz jumys istegen 32 ózbekstandyq elden shyǵaryldy
TARAZ. QazAqparat – Jambyl oblysynda 30-dan astam sheteldik azamat QR aýmaǵynda bolý erejelerin buzǵan, - dep habarlaıdy QazAqparat tilshisi.
Jambyl oblysynyń Polıtsııa departamenti bastyǵynyń buıryǵymen Taraz qalasynyń Polıtsııa basqarmasy kóshi-qon qyzmeti bóliminiń qyzmetkerleri «Mıgrant» jedel aldyn alý is-sharasyn ótkizdi.
Jedel aldyn alý is-sharasy zańsyz kóshi-qon arnalarynyń jolyn kesý, zańsyz eńbek qyzmetimen aınalysatyn sheteldikterdi anyqtaý, shekarany zańsyz kesip ótý jáne sheteldik kúshterdi paıdalaný erejelerin birneshe ret buzý derekterin jáne olardy uıymdastyrýshylardy anyqtaý maqsatyna negizdeldi.
«Shara barysynda Taraz qalasy Shalǵaı Qarasý massıvinde oblys aýmaǵynda zańsyz jumys istegen Ózbekstan Respýblıkasynyń 32 azamaty anyqtaldy. Olar osy aýdanda ǵımarat salý jumystarymen aınalysqan. Atalǵan derekke qatysty Qazaqstan Respýblıkasy Ákimshilik quqyq buzýshylyq týraly kodeksiniń 517-baby 5-bóligi boıynsha ákimshilik hattama toltyrylyp, ákimshilik is sotqa jiberildi. Sot sheshimimen Ózbekstan azamattary Qazaqstannan shyǵaryldy», - deıdi Taraz qalasynyń Polıtsııa basqarmasy kóshi-qon qyzmeti bóliminiń bastyǵy Sovet Kenjebaev.
