Tarazda zańsyz salynǵan 59 nysan anyqtaldy

TARAZ. QazAqparat – Taraz qalasynyń ákimi Erjan Jylqybaevtyń tóraǵalyǵymen ótken apparattyq jıynda memlekettik baǵdarlamalardyń oryndalýy, qaladaǵy beı-bereket ornalasqan saýda oryndaryn retke keltirý jumystary, «saqaldy», zańsyz, «qyzylsyzyq» talaptary saqtalmaı salynǵan qurylys nysandary, jáne jer telimderin zańsyz ıelený máseleleri saralandy, dep habarlaıdy QazAqparat tilshisi.

«Eńbek» baǵdarlamasy aıasynda bıyl 7501 adamdy jumyspen qamtý josparlansa, búginde ol 92,1% oryndalǵan. Baǵdarlama aıasynda 270 adam qysqa merzimdik kýrstardan ótýde «Bastaý Bıznes» jobasy boıynsha kásipkerlik negizderine 900 adam oqýǵa joldanyp, 857 adam sertıfıkat alǵan.

Sondaı-aq, «Qaýipsiz mektep» pılottyq jobasy aıasynda 7 mektepke týrnıket jáne 60 mektepte dabyl túımesin ornatý jumystary júrgizilýde.

«Nurly jer» memlekettik baǵdarlamasy aıasynda búginde «Qumshaǵal», «Shóldala» shaǵyn aýdandary men 28 saıajaı alabyn, «Shalǵaı Qarasý 1,2,3,4,5,6,7» turǵyn alabtaryn elektrmen jabdyqtaý jumystary júrgizilýde. Qazirgi tańda «Kóktem» turǵyn alabyna gaz taratý jelisiniń ekinshi kezeńi bastaý alsa, Qumshaǵal alabyndaǵy ınjenerlik-kommýnıkatsııalyq ınfraqurylym jelileri paıdalanýǵa beriledi dep kútilýde.

Jalpy Taraz qalasynda 35 «Saqaldy qurylys» nysany anyqtalyp, ıelerimen túsindirý jumystary ótkizilgen. Nátıjesinde bir nysannyń qurylysy tolyq aıaqtalyp, 11 nysannyń qurylys- montajdaý jumystary júrip jatyr. Qalǵan 23 nysannyń ıelerine shara qoldaný maqsatynda qujattary sotqa joldanǵan. Qala aýmaǵynda «qyzyl syzyq» normalaryn buzyp, zańsyz qurylys júrgizgen 59 nysan anyqtalyp, 44 nysan ıesine aıyppul salyndy.

Qalǵan nysandarǵa qatysty tıisti jumystar júrgizilýde.

Jıyn sońynda qala ákimi «Bıznestiń jol kartasy-2025» memlekettik baǵdarlamasy aıasynda iske asyrylyp jatqan jobalarǵa taldaý jasaýdy, jalpy baǵdarlamalar aıasyndaǵy kórsetkishterdi arttyrý baǵytynda tıisti jumystardy qolǵa alýdy jáne bilim mekemelerine

týrnıketter ornatý boıynsha jumystardy jedeldetýdi tapsyrdy.