Tarazda zańsyz oıyn bıznesiniń joly kesildi
TARAZ. QazAqparat - Tarazda jedel-saýyqtyrý sharasynyń barysynda zańsyz oıyndar uıymdastyrylyp kelgen ǵımarat anyqtaldy. Bul týraly QazAqparat Jambyl oblystyq Polıtsııa departamentiniń baspasóz qyzmetine silteme jasap habarlaıdy.
«Jambyl oblystyq Polıtsııa departamentiniń Uıymdasqan qylmyspen kúres basqarmasynyń qyzmetkerleri Tarazda arnaıy ruqsat qujattarynsyz jumys istep kelgen oıyn bıznesine arnalǵan ǵımaratty anyqtady»,-dep habarlady vedomstvonyń baspasóz qyzmeti.
Tekserý kezinde oıyn apparattary, elektrondy rýletka, beınetirkegish, oıyn fıshkalary, qoldan jasalǵan lotereıa bıletteri, lototron, býhgalterlik qujattar sııaqty zattaı aıǵaqtar men 50 myń teńge tabyldy. Tekserý barysynda barmen men kassır qolǵa tústi.
Polıtseıler «Oıyn bıznesi týraly» zańnyń qadaǵalanýyn qamtamasyz etýge baǵyttalǵan jedel-izdestirý sharasynyń «Azamattardyń quqyqtaryn qorǵaý komıteti» qoǵamdyq birlestigi ókilderiniń qatysýymen júrgizilgendigin aıtty.
Tárkilengen zattar boıynsha, sot taraptamasy taǵaıyndaldy. Sondaı-aq QR QK-niń 307 baby, 1 bóligi boıynsha, ıaǵnı zańsyz oıyn bıznesin jáne zańda belgilenbegen oryndarda qumar oıyndar uıymdastyrý áreketteri boıynsha sotqa deıingi tergeý jumystary bastaldy.
Aıyptalýshylardyń kinási dáleldense, olar 2 000 AEK kóleminde aıyppul tólep, túzeý jumystaryna jegilýi múmkin. Sondaı-aq 2 jylǵa bas bostandyǵynan aıyrylyp, múlikteri tárkilenýi yqtımal.
