Tarazda zańsyz salynǵan saýda kesheni súriletin boldy
ASTANA. KAZINFORM – Tarazda jobalyq qujattamasyz, saraptama qorytyndysynsyz jáne mindetti tehnıkalyq qadaǵalaýsyz salynyp jatqan saýda kesheni súriledi. Sot jer ýchaskesiniń ıesine nysandy buzý úshin bir aı ýaqyt berdi, dep habarlaıdy Kazinform tilshisi.
Sot otyrysy qujattardy qaraýmen ǵana shektelmeı, tikeleı bazar aýmaǵynda ótti. Protseske qatysýshylar eki qabatty temir-beton baǵandary men beton jabyndarynan turǵyzylǵan aýqymdy qurylysty óz kózderimen kórdi.
Soǵan qaramastan, aınaladaǵy saýda toqtatylmaǵan. Jumys istep turǵan saýda pavılondary qurylystyń dál astynda jáne eki jaǵynda ornalasqan. Qurylys alańy qorshaýmen de, qorǵanys bógetterimen de oqshaýlanbaǵan.
Іs memlekettik sáýlet-qurylys baqylaýy basqarmasy júrgizgen tekserýden keıin qozǵaldy. Jer ýchaskesi kásipkerdiń menshiginde bolǵanymen, saýda kesheniniń qurylysy qajetti qujattarsyz bastalǵan.
Tekserý barysynda kásipkerde jobalyq qujattama men saraptamanyń oń qorytyndysy bolmaǵany anyqtaldy. Sondaı-aq qurylys avtorlyq jáne tehnıkalyq qadaǵalaýsyz júrgizilip, ýákiletti organdarǵa qurylys jumystarynyń bastalǵany týraly habar berilmegen. Budan bólek, qurylys alańynda mindetti qaýipsizdik talaptary saqtalmaǵan.
Sotta atalǵan zań buzýshylyqtardyń barlyǵy rastaldy. Jambyl oblysynyń mamandandyrylǵan aýdanaralyq ekonomıkalyq soty memlekettik sáýlet-qurylys baqylaýy basqarmasynyń talap-aryzyn qanaǵattandyrdy.
Endi kásipker zańsyz salynǵan nysandy óz qarajaty esebinen súrip, jer ýchaskesin bastapqy qalpyna keltirýge mindetti.
Buǵan deıin Almatydaǵy Gogol kóshesinde zańsyz salynǵan «Bereke» bazarynyń súrilgeni habarlanǵan.
Al Almaty qalasyndaǵy «Baısat» bazary qalanyń kommýnaldyq menshigine ótýi múmkin.
