Tarazda úıi órtenip ketken otbasyǵa jańa baspana berildi
TARAZ. QazAqparat –Taraz qalasynda úıi órtenip ketip, úsh balasymen dalada qalǵan jalǵyzbasty ana baspanaly boldy,- dep habarlaıdy QazAqparat tilshisi.
Aǵymdaǵy jyly 1 maýsym kúni oqystan shyqqan órt saldarynan úıi tolyǵymen janyp ketken tarazdyq Marııa Kırıakıdı kámeletke tolmaǵan úsh balasymen birge dalada qalǵan bolatyn. Bul oqıǵa týraly habar áleýmettik jelilerde jedel tarap, kóptegen qamqor jandar otbasynyń qıyn haline alańdaýshylyq bildirip, janashyrlyq tanytqan edi. Qala ákimdigi de kómektesti.
Órt sóndirýshiler órttiń elektr jelilerindegi aqaýdan bolǵanyn, jalyn şarpyǵan aýmaqtyń 100 sharshy metrdi quraǵanyn anyqtady. Abyroı bolǵanda, áıel men balalar tilsiz jaýdan aman qalǵan. Áıtpese, úıdegi barlyq zattar, jıhazdar, aqsha jáne qujattar túgel janyp ketken. Qıyn jaǵdaıǵa tap bolǵan jalǵyzbasty ana qala turǵyndarynan kómek surady. Eriktiler oqıǵa týraly aqparatty áleýmettik jelilerde taratýǵa kómektesip, zardap shekken otbasy úshin kómek jınady.
Qaıyrymdy jandardyń arqasynda zardap shekkenderge alǵashqy qoldaý kórsetildi. Óz esimin jasyrǵysy kelgen tarazdyq kásipkerlerdiń biri atalǵan otbasynyń múmkindiginshe tezirek úıli bolýyna kóńil bóledi. Ol jeke qarajatynan 9,2 mıllıon teńgege tórt bólmeli úı satyp alyp berip, búginde úı-kúısiz qalǵan áıel bala-shaǵasymen birge sonda turyp jatyr. Onyń ornyna Marııa barlyq qujattar qalpyna keltirilgennen keıin, óziniń órtengen úıi ornalasqan jer telimin kásipkerge beredi.
«Men bul usynysqa qýana kelistim, óıtkeni órtten keıin úıimizdi óz betimizshe qalpyna keltire almas edik. Kúıeýim qaıtys bolǵan, eki ul men bir qyzymdy ózim jalǵyz tárbıelep otyrmyn. Bizge jańa úı qatty unady. Endi balalardyń ózderiniń armandaǵan jeke bólmeleri bolady. Qazirgi tańda ómirimiz birtińdep jaqsaryp keledi. Qaıyrymdy adamdar kún saıyn qońyraý shalyp, kómek usynýda. Bireýleri kıim men aıaq kıim, endi bireýi jıhaz ben qural-jabdyqtar ákep berýde. Azyq - túlikpen de kómektesýde. Mysaly, uıǵyr etnomádenı ortalyǵynyń ókilderi oqıǵa bolǵan kezden bastap qolushyn sozýda. Biz barlyǵyna úlken alǵysymyzdy bildiremiz. Bizdiń qalamyzda qıyn sátterde kómekke kelýge daıyn kóptegen meıirimdi, kishipeıil adamdar bar ekenin seziný úlken qýanysh», - dedi Marııa Kırıakıdı.
Sondaı-aq, áıel qala ákimdiginiń kórsetken qoldaýyn aıryqsha atap ótti. Ákimdik qyzmetkerleri bul otbasynyń baspanasyz qalmaýyna óz deńgeıinde atsalysa bilgen. Qalalyq jumyspen qamtý jáne áleýmettik baǵdarlamalar bólimi arqyly otbasyna 277 myń teńge kóleminde materıaldyq kómek tólengen. «Jasyl El – Taraz» JShS-niń qyzmetkerleri Marııanyń aýlasyn abattandyrýǵa, eski aǵashtardy butaýǵa, qorshaýdy syrlaýǵa tegin kómektesken.
Taraz qalasy ákimdiginiń baspasóz qyzmeti habarlaǵandaı, Marııaǵa qujattardy qalpyna keltirýge barlyq tıisti kómek kórsetiledi.
