Tarazda úıde qulyptanyp qalǵan 80-nen asqan qart pen balalar qutqaryldy
TARAZ. QazAqparat – Jambyl oblysy Tótenshe jaǵdaılar departamentiniń «112» qyzmetine bir táýlikte birqatar shaqyrtý tústi. Olardyń deni úıde qulyptanyp qalǵan balalar men qarttardy qutqarýǵa qatysty,- dep habarlaıdy QazAqparat tilshisi.
Atap aıtsaq, Jambyl oblysy TJD Órt sóndirý jáne avarııalyq-qutqarý jumystary qyzmeti Jedel-qutqarý jasaǵynyń qutqarýshylary Taraz qalasy, «Qarasý» móltekaýdanyndaǵy kópqabatty turǵyn úıdiń birindegi páter ishinde esigin asha almaı otyrǵan 84 jastaǵa qart ájege kómek kórsetken. Sondaı-aq, Taraz qalasy, «Qarataý» móltekaýdanyndaǵy kópqabatty turǵyn úıdiń birindegi páter ishinde 2 jáne 3 jastaǵy balalar qulyptanyp qalǵan. Qutqarýshylar arnaıy quraldardyń kómegimen esikti ashqan.
Budan bólek, Taraz qalasy, Baızaq batyr kóshesindegi kópqabatty turǵyn úıdiń birindegi páterdiń esigin ashyp, 80 jastaǵy ájeni «103» medıtsınalyq jedel járdem qyzmetine tapsyrǵan.
Oblystyq TJD osy jaǵdaılardy eskere otyryp, turǵyndardy balalar men qarttardy qaraýsyz qaldyrmaýǵa shaqyrady.
«Mundaı jaǵdaılar kóbinese jalǵyzbasty qarııalar men jas balalardy úıde qaraýsyz qaldyrǵandyqtan bolady. Osyǵan oraı Jambyl oblysy TJ deparatmenti qala jáne oblys turǵyndaryna qart kisilerge árdaıym qamqorlyq tanytyp, jalǵyz qalýyna jol bermeı, balalardy syrtynan qulyptap ketýdi doǵaryp, týystarǵa nemese senim artqan kórshilerge tapsyryp, qaraýsyz qaldyrmaýlaryńyzdy suraıdy»,-delingen departamenttiń habarlamasynda.
