Tarazda uıaly telefondardyń IMEI-kodyn ózgertken eki kúdikti ustaldy
TARAZ. QazAqparat - Jambyl oblysy polıtsııa departamenti Krımınaldyq polıtsııa basqarmasynyń qyzmetkerleri jedel-izdestirý barysynda uıaly telefondardyń sáıkestendirý kodyn (IMEI-kod) zańsyz ózgertti degen kúdikpen eki adamnan turatyn qylmystyq topty anyqtady, dep habarlaıdy QazAqparat.
Atap aıtqanda, Tarazdyń 37 jáne 25 jastaǵy eki turǵyny urlanǵan smartfondardyń IMEI-kodyn ózgertý deregi boıynsha kúdikti dep tanyldy. Bul týraly oblystyq polıtsııa departamentiniń baspasóz qyzmeti málimdedi.
«Sanktsııalanǵan tintý barysynda kúdiktilerdiń páterinen derbes kompıýter, ipad jáne 60 dana uıaly telefon tabylyp, tárkilendi. Olardyń barlyǵy urlanǵan telefondardyń bazasy boıynsha tekserilýde. Sonymen qatar, atalǵan azamattarǵa uıaly qurylǵylardy jetkizip, satyp alǵan, keıinnen naryqqa ótkizgen degen kúdikpen 33 jastaǵy oblys ortalyǵynyń turǵyny qolǵa tústi»,- delingen málimdemede.
Qazirgi tańda kompıýterlik tehnologııalardy zertteý boıynsha sot-tehnıkalyq saraptama taǵaıyndaldy. Qylmystyq kodekstiń 213-baby 2-bóligi boıynsha sotqa deıingi tergeý amaldary júrgizilýde.
