Tarazda urlanǵan kólikpen polıtsııadan qashqan ury balalar oıyn alańyna soqtyǵysty
TARAZ. QazAqparat – Tarazdyq polıtseıler kólik urlap, jol kólik oqıǵasyn jasaǵan kúdiktini qolǵa túsirdi, - dep habarlaıdy QazAqparat tilshisi.
Taraz qalasy Polıtsııa basqarmasynyń jedel basqarý ortalyǵynyń «102» pýltine oblys ortalyǵynyń turǵynynan belgisiz tulǵa úıdiń aýlasyna qoıylǵan «Hyundai» markaly avtokólikti aıdap ketkeni týraly habarlama túsken.
Qala aýmaǵynda avtokólik urlaýshyny ustaý boıynsha jedel is-sharalar júrgizildi.
Іs-shara barysynda Taraz qalalyq PB jedel basqarý ortalyǵynyń operatorlary avtokóliktiń ornalasqan jerin anyqtap, odan keıin patrýldik polıtsııa batalonynyń qyzmetkerleri uryny ustaý boıynsha sharalar qabyldaǵan. Bul týraly oblystyq polıtsııa departamentiniń baspasóz qyzmeti habarlady.
- 38 jastaǵy kúdikti qala syrtyna shyǵý úshin qýǵynnan qashýǵa tyrysyp, joǵary jyldamdyqpen júrip, kólikti basqara almaı, «Astana» móltek aýdanyndaǵy aýlalardyń birindegi balalar oıyn alańyna soqtyǵysqan. Ol kólikti tastap, oqıǵa ornynan boı tasalaýǵa tyrysqan. Kúdikti kóp uzamaı qolǵa túsip, polıtsııaǵa jetkizildi,-deıdi Taraz qalasy Polıtsııa basqarmasy bastyǵy Asylhan Zaýrbekov.
Atalǵan derek boıynsha QR QK 200-baby 1-bóligi boıynsha sotqa deıingi tergeý bastaldy.
Kúdikti Taraz qalasynyń ýaqytsha ustaý ızolıatoryna qamaqqa alyndy.
