Tarazda urlanǵan 27 telefon sheteldikke satylǵan
TARAZ. QazAqparat - Tarazda uıaly telefon urlap, satýmen aınalysqan qylmystyq toptyń joly kesildi, dep habarlaıdy QazAqparat tilshisi Jambyl oblystyq ІІD baspasóz qyzmetine silteme jasap.
Merki aýdanynda Qyrǵyzstannyń 28 jastaǵy azamaty ustalyp, odan jańa modeldegi 27 uıaly telefon tárkilengen. Telefondardyń naryqtaǵy quny shamamen 700 myń teńgeni quraıdy. Tergeý kezinde Qyrǵyz Respýblıkasynyń azamaty gadjetterdi Tarazda satyp alǵanyn málim etti.
Smartfondardy saýdalaǵan Tarazdyń 24 jastaǵy turǵyny ustaldy. Ol oblys ortalyǵyndaǵy «Chaıka» dúkeniniń mańynda uıaly telefondardy satyp alýmen aınalysqan. Jigit qyrǵyzstandyq klıentke 27 telefon satqanyn rastady, biraq mobıldik qurylǵylardyń qujaty bolmaı shyqty.
«Tárkilengen telefondardy tekserý kezinde satylǵan gajdetterdiń 11-iniń ıesi anyqtaldy. Olar ártúrli ýaqytta «uıaly telefonymdy urlattym» dep polıtsııaǵa aryzdanǵan. Osy is boıynsha, Tarazdyń 25 jastaǵy taǵy bir turǵyny ustaldy. Ol uıaly telefondardy urlaǵanyn, artynsha, «Chaıka» dúkeniniń mańynda satyp jibergenin moıyndady. Bir aıta keterligi, satyp alýshy da urlanǵan telefondardy alyp jatqanyn bilgen», - dep málimdedi Jambyl oblystyq ІІD baspasóz qyzmeti.
Osy derek boıynsha QR Qylmystyq kodeksiniń «Kórineý qylmystyq jolmen tabylǵan múlikti ıemdený nemese ótkizý» babymen sotqa deıingi tergeý bastaldy.
