Tarazda Ulttyq ulan sarbazdary bir kúnde úsh qylmysty ashty
TARAZ. QazAqparat - Tarazda Ulttyq ulan sarbazdary bir kúnde úsh qylmysty izin sýytpaı ashty, dep habarlaıdy QazAqparat Ulttyq ulannyń baspasóz qyzmetine silteme jasap.
Osylaısha, qatardaǵy jaýyngerler Álibek Baıtashev, Nurasyl Oralǵazın jáne Ákimjan Sálıevten quralǵan áskerı jasaq bir adamdy ustady. Tekserý kezinde odan iPhone 8+ telefony men 358 myń teńge kóleminde aqsha tabyldy. Buǵan deıin áskerı qyzmetkerlerge 4-shi shaǵynaýdanda adam tonaý qylmysy jasalǵany týraly habarlama kelgen bolatyn. Ustalǵan azamat polıtsııanyń tirek pýnktine jetkizilgen.
Sol kúni qatardaǵy jaýyngerler Ańsaǵan Orynov, Bahtııar Jıtvaev jáne Aleksandr Ilın T.Rysqulov kóshesinde kúdikti bolyp kóringen azamatty ustaǵan. Tekserý kezinde onyń qujattary bolmaǵany anyqtaldy. Tulǵasyn anyqtaý úshin er adam polıtsııa bólimshesine jetkizilip, onda LG markaly telefondy urlaǵany úshin izdeýde ekeni anyqtalǵan. Ustalǵan azamat óz kinásin moıyndady.
Úshinshi oqıǵada Ulttyq gvardııanyń 5513 áskerı bóliminiń serjanty Álimjan Júnisov, qatardaǵy jaýyngerler Aslan Qalyqbaı jáne Baýyrjan Qurmanbekovten quralǵan áskerı jasaq Taraz turǵynyna urlanǵan velosıpedin qaıtarýǵa kómektesti. Ony urlaǵan adam polıtsııa bólimine jetkizilip, kinásin moıyndady.
