Tarazda «Ult tarıhy jáne uly tulǵalar» atty respýblıkalyq konferentsııa ótti
ASTANA. QazAqparat - Búgin Jambyl oblysy ákimdiginiń ishki saıasat basqarmasynyń uıymdastyrýymen M.H.Dýlatı atyndaǵy Taraz Memlekettik ýnıversıtetiniń bas ǵımaratynda «Ult tarıhy jáne uly tulǵalar» atty respýblıkalyq ǵylymı-praktıkalyq konferentsııasy ótti, dep habarlaıdy QazAqparat.
Konferentsııanyń maqsaty - Qazaqstan tarıhynyń jańa sıpattaǵy zerttelý úderisin talqylaý bolatyn. Sonymen qatar onda memlekettik tildiń Táýelsizdik jyldaryndaǵy damý úrdisi jáne el Táýelsizdigin alǵaly beri qaıratker áıelderdiń jetken jetistikteri men jastardy ıntellektýaldyq baǵytta tárbıeleý joldaryna qatysty máseleler sóz boldy.
Konferentsııaǵa Almaty qalasynan QR Bilim jáne ǵylym mınıstrligi Sh.Ýálıhanov atyndaǵy atyndaǵy tarıh jáne etnologııa ınstıtýtynyń dırektory, tarıh ǵylymynyń doktory Hangeldi Ábjanov qonaq boldy. Ol búgingi basqosýǵa qatysýshylarǵa óziniń «Tarıh jáne tulǵa» atty baıandamasyn tanystyrdy.
Sonymen qatar, QR Bilim jáne ǵylym mınıstrligi A.Baıtursynov atyndaǵy Til bilimi ınstıtýtynyń aǵa ǵylymı qyzmetkeri, fılologııa ǵylymynyń doktory, professor Zeınep Bazarbaeva «Memlekettik til - rýhanı táýelsizdiktiń basty tiregi» atty taqyrypta baıandama jasady. «Táýelsizdiktiń ıntellektýaldyq negizderi» atty baıandamasyn Abaı atyndaǵy QazUPÝ-dyń prorektory, tarıh ǵylymdarynyń doktory, professor Ǵabıt Kenjebaev oqyp berdi.
Konferentsııaǵa oblystyń zııaly qaýymy, BAQ ókilderi, ardagerler keńesiniń músheleri, joǵary oqý oryndarynyń stýdentteri jáne Taraz qalasynyń mektepteriniń tarıh pániniń muǵalimderi men oqýshylary qatysty. Jıynda kóterlgen máselelerdi barlyǵy 500-den astam adam tyńdady.
