Tarazda ult ókilderiniń óneri saralanǵan festıval ótti
ASTANA. QazAqparat - Taraz memlekettik pedagogıkalyq ınstıtýtynda (TarMPI) QR Táýelsizdiginiń 25 jyldyǵyna oraı «Kók týdyń astynda birgemiz» atty óner festıvali ótti.
Sharaǵa oqý ornynda bilim alyp jatqan túrli ult ókilderi qatysty. Bul týraly QazAqparat TarMPI-dyń Aqparattyq-ımıdjdik qyzmetine silteme jasap habarlady.
Festıvaldi ótkizýdegi basty maqsat - elimiz halqynyń ultaralyq jáne konfessııaaralyq kelisimin, ózara túsinistigi men syılastyǵyn dáripteý, dostyq pen birlikti nyǵaıtý.
«Birlik bar jerde - tirlik bar» deıdi bizdiń halyq. Álbette, muny teginnen-tegin aıta salmasa kerek. Aýyzbirlik pen túsinistik, qarapaıym syılastyq ústemdik qurǵan jerlerge qashan da nátıjeli isterdiń úıir bolatyny belgili. Bizdiń elimizde qalyptasqan ulttar tutastyǵy men halyqtar dostyǵynyń arqasynda búginde memleketimiz órkendep, ilgeri basyp keledi. Qazaqstan Respýblıkasyn meken etken 130-dan astam ult ókili kúni búginge deıin yntymaqta, bir úıdiń balasyndaı tatý-tátti jarasymdy tirshilik keship keledi. Júzi basqa bolǵanymen júregi bir, tili basqa bolǵanymen tilegi bir, maqsat-múddesi ortaq, birligi myqty, dostyǵy berik ulttar qazaq eliniń salt-dástúrine, ulttyq qundylyqtaryna qurmetpen qaraıdy. Sondaı-aq qazaq halqynyń qarapaıymdylyǵy, qonaqjaılylyǵy, baýyrmaldylyǵy úshin erekshe baǵalaıdy. Bastysy, ózderi qonys tepken Qazaqstan jeriniń barlyq ulanymen týys bolýdy kózdeıdi. Mine, bul turǵyda osy taqilettes sharalardyń mańyzy óte zor ekendigi daýsyz», - dedi TarMPI rektory Darııa Qojamjarova.
Festıvalǵa Taraz memlekettik pedagogıkalyq ınstıtýtynda bilim alyp jatqan 9 ult ókili qatysty. Úsh kezeń boıynsha synǵa túsken olar jınalǵandardy óz ultynyń mádenıetimen jáne salt-dástúrimen tanystyryp qana qoımaı, halyq ánderin de shyrqady. Sondaı-aq, ulttyq taǵamdaryn ázirlep, olardy daıyndaý tásilderimen bólisti.
Baıqaý qorytyndysy boıynsha jeńimpaz atanǵandar ınstıtýt rektorynyń Alǵys hattarymen jáne baǵaly syılyqtarmen marapattaldy.
