Tarazda «Ulan» stadıony paıdalanýǵa berildi
TARAZ. QazAqparat – Taraz qalasyndaǵy qaıta jańǵyrtýdan ótken «Ulan» stadıony ashyldy. Sport kesheninde jańa oryndyqtar ornatylyp, jańa júgirý jolaǵy paıda boldy. Sondaı-aq, tórt fýtbol alańy jańartylyp, ákimshilik ǵımarat jóndeldi, - dep habarlaıdy QazAqparat tilshisi.
Jambyl oblysynyń ákimi Berdibek Saparbaev oblys ortalyǵynyń turǵyndaryn qýanyshty oqıǵamen arnaıy quttyqtady.
«Búginde jambyldyqtardyń 32 paıyzy buqaralyq sportpen aınalysady. Bizdiń maqsatymyz - bul kórsetkishti arttyra túsý, óıtkeni kez-kelgen eldiń jetistigi, eń aldymen, ulttyń densaýlyǵyna baılanysty. Osy oraıda oblysymyzda jańa sport nysandary salynyp, eskileri qaıta jańǵyrtylýda. «Ulan» stadıony buǵan deıin tozyp, aıanyshty kúıde bolǵan. Trıbýnalar, fýtbol alańy bári eskirgen edi. Balalar eski doptarmen oınap júrgen. Endi, mine, birneshe aıdyń ishinde stadıonnyń adam tanymastaı ózgergenin kórip turmyz. Jaqyn mańdaǵy saıabaq ta kóp uzamaı jańa keıipke enetin bolady. Ata-analar balalary stadıonda shynyǵyp jatqanda, sol saıabaqta tynyǵyp ýaqyt ótkizetin bolady», - dedi oblys ákimi.
Sonymen qatar, stadıon aýmaǵynda eki qabatty jekpe-jek zaly boı kóterdi. Jas sportshylar munda fýtbol, jeńil atletıka, erkin kúres, dzıýdo, armrestlıng, ústel tennısi, karate jáne bokspen aınalysa alady. Buryn olar ynǵaılastyrylǵan nysanda jattyqqan bolsa, endi olar úshin zamanaýı kópfýnktsıonaldy ǵımaratta aınalysa alady.
Turǵyndardy kópten kútken qýanyshymen quttyqtaýǵa tanymal qazaqstandyq taekvondoshy Rýslan Japarov ta arnaıy keldi.
«Bala kezimde meniń kóp jattyǵýym osy jerde ótken bolatyn. Men stadıonnyń jańartylǵanyna shyn júrekten qýanyshtymyn, endi balalar qolaıly jaǵdaıda shuǵyldanatyn bolady», - dedi ol.
1988 jyly salynǵan sport kesheni №5 mamandandyrylǵan balalar men jasóspirimder sport mektebiniń balansynda. Dırektory – grek-rım kúresinen sport sheberi, Olımpıada oıyndarynyń júldegeri Aqjúrek Tańatarov.
«Jambyldyq palýandar, dzıýdoshylar, boksshylar túrli jarystarda jeńimpazdar qatarynan kórinip keledi. Biz osy baǵytta ári qaraı damyp, Olımpıada chempıondaryn daıyndaýǵa nıettimiz», - deıdi Aqjúrek Tańatarov.
