Tarazda túzeý mekemesine esirtkini jańǵaqqa salyp ótkizbek bolǵan

TARAZ. QazAqparat – Jambyl oblysy Taraz qalasyndaǵy erekshe rejımdegi JD-158/7 túzeý mekemesiniń erejesin buzyp, zańǵa qaıshy áreketke baratyndar azaımaı tur. Sońǵy ýaqytta tıym salynǵan zattardy poshta arqyly jiberý beleń alǵan, dep habarlaıdy QazAqparat tilshisi.

Aǵymdaǵy jyldyń 19 shildesi kúni mekeme qyzmetkerler kezekti ret qamaýdaǵylarǵa kelip túsken sálem-saýqatty tekserý barysynda kóńilge kúpti, kúdikti zattardy anyqtaǵan.

Rejım bóliminiń aǵa leıtenanty Baıbolat Qýandyq, tintý bóliminiń baqylaýshysy B.Teleý oramahatty jiti tintý kezinde 5 grek jańǵaǵy ishinen qoıý jasyl tústi, ózine tán ıisi bar zatpen toltyrylǵandyǵyn anyqtaǵan. Sondaı-aq, bir jańǵaqtyń ishinen uıaly telefondy qýattaıtyn sym tabyldy. Mundaı qýlyqty uıymdastrýshylar jańǵaqty muqııat jelimdep, tabıǵı qalpyna keltirýge tyrysyp baqqan.

«Sot-saraptamalyq taldaý kórsetkendeı kúmándi zat 17 gramm «gashısh» esirtkisi ekendigi dáleldengen. «Sálemdeme» Almaty oblysy, Talǵar qalasy, Qyzyltý aýylynan QR QK 191b.2t, 14b.2t, boıynsha sottalǵan A.N.Sh-qa joldanypty. Qazirgi tańda Taraz qalalyq Polıtsııa basqarmasy 1-shi Polıtsııa bólimi tarapynan QR Qylmystyq Kodeksiniń 297 bap 1 tarmaǵyna saı esirtkini ótkizý boıynsha is qozǵaldy»,-delingen vedomstvo málimdemesinde.