Tarazda turmystyq tehnıka shyǵaratyn zaýyt salynady

TARAZ. QazAqparat – Tarazda alǵash ret turmystyq tehnıkalar shyǵaratyn zaýyt salý jobasy qolǵa alynyp otyr, dep habarlaıdy QazAqparat.

Oblys ákimdigi kásipkerlik jáne ındýstrıaldy-ınnovatsııalyq damytý basqarmasynyń ǵımaratynda jańa jobanyń tanystyrylymy ótti. Jobamen Kásipkerlik jáne ındýstrıaldy-ınnovatsııalyq damytý basqarmasy basshysynyń mindetin atqarýshy Danııar Jumanqulov tanystyrdy. Onyń aıtýynsha, aldaǵy ýaqytta salynatyn zaýyt gaz plıtalaryn, tońazytqyshtar, kondıtsıonerler taǵy da basqa turmystyq zattar shyǵarýmen aınalyspaq.

Búginde otandyq óndiristi qoldaý úshin barlyq jaǵdaı jasalýda. Endi tek zaýyt salynatyn oryndy anyqtap alý kerek. Ol úshin Taraz qalasy aýmaǵynan jańa zaýyt salýǵa 7 gektar jer telimi qarastyrylýda.

Atalǵan jobanyń júzege asyrylýyn jáne iske qosylýyn Álııa Kómekbaeva basshylyq etetin «Alima DELUX» jaýapkershiligi shekteýli seriktestigi qolǵa alyp otyr. Ol zaýyt iske qosylǵannan keıin onda jylyna 100 myń dana turmystyq tehnıka shyǵarylmaq.

Kásiporyndy salýǵa Túrkııadan ınvestor tartylýda. Sonymen birge «Kazakhinvest» UQ» aktsıonerlik qoǵamy da zaýytty salýǵa qolushyn bermek. Joba júzege asqan jaǵdaıda 500 adamǵa jańa jumys orny ashylady dep josparlanýda.

Seriktestik zaýyt qurylysyn bıyl qolǵa alyp, keler jyly taýar óndire bastaýǵa nıetti.