Tarazda túrmedegi týysyna aqsha alyp ótpek bolǵan áıel ustaldy
TARAZ. QazAqparat - Tarazdaǵy túzetý mekemesinde jazasyn ótep jatqan sottalýshyǵa aqsha alyp ótpek bolǵan azamatsha ustaldy. Qatań rejımdegi 158/7 mekemesindegi týysyna kelgen shymkenttik turǵynnyń zańǵa qaıshy áreketi saqshylardyń tekserýi kezinde belgili bolǵan, dep habarlaıdy QazAqparat.
158/7 túzetý mekemesindegi jazasyn óteýshige kelgen azamatsha 5 myń teńgeni óziniń shulyǵyna tyǵyp, ishke alyp kirmek bolǵan. Ony tekserý tobynyń qyzmetkerleri anyqtaǵan. Endi 43 jastaǵy turǵyn bul áreketi úshin zań aldynda jaýap beredi.
«Qazirgi tańda oǵan qatysty QR Ákimshilik quqyq buzýshylyq týraly kodpeksiniń 481-baby boıynsha hattama toltyrylyp, is-qujattary sotqa jiberildi. QR Qylmystyq-atqarý kodeksiniń 98-baby boıynsha atalǵan azamatshanyń 1 jylǵa deıin sottalǵandarmen kezdesýine tyıym salynady. Sondaı-aq,sotqa baılanysty eskertý nemese aıyppul túrindegi jaza qoldanylady», - deıdi 158/7 túzetý mekemesi basshysynyń mindetin atqarýshy Meıirǵalı Raqyshev.
Aıta keteıik, jyl basynan beri Jambyl oblysyndaǵy qylmystyq atqarý júıesi departamentine qarasty mekemelerde osyǵan uqsas 4 oqıǵa tirkelgen. Jazasyn óteýshilerdiń týystarynan tárkilengen tyıym salynǵan dúnıelerdiń deni - uıaly telefondar men iri kólemdegi sım-kartalar, sondaı-aq, aqsha jáne esirtki zattary.
