Tarazda týrıstik aýmaqtar keńeıtilip jatyr
TARAZ. QazAqparat - Ashyq aspan astyndaǵy «Ejelgi Taraz» arheologııalyq saıabaqqa zamanaýı tarıhı dáýirdi kórsetetin jańa týrıstik aımaqtar qosylýy múmkin, dep habarlaıdy QazAqparat tilshisi.
X-XII ǵasyrdaǵy «Ejelgi Taraz» arheologııalyq saıabaǵyna jaqyn jerde «Áýlıeata sharshysy» ornalasqan. Bul XIX ǵasyrdyń ekinshi jartysy men XX ǵasyrdyń basynda qarqyndy damyǵan qala bóligi.
«Mundaı qam kirpishten salynǵan bir qabatty ǵımarat bar. Ol birneshe jer silkinisine tótep bergen. Osyndaı biregeı qurylymdar qazir jarnamalarmen kóriksizdendirilip otyr. Olardyń ıeleri túbegeıli ózgertip nemese qıratyp jatyr. Biraq, sol dáýirdiń kýási bolǵan qurylymdar qundy ǵoı», - dedi tanymal jambyldyq tarıhshy Táken Moldaqynov.
«Obelısk» qoǵamdyq birlestigi uzaq ýaqyt boıy týrıster úshin ejelgi qalanyń tarıhı bóligin Áýlıeata kezeńi aımaǵyn qurý arqyly keńeıtýdi uzaq ýaqyt boıy usynyp keledi. Birlestik osy jerden XX ǵasyrdyń kolorıtin quryp, sol dáýirdiń ǵımarattaryn qalpyna keltirip, qaıta qurylymdaýdy suraýda. Taıaýda oblystyq ákimdikte ótken jınalysta «Áýlıeata sharshysyn» qurý máselesi kóterildi.
Jambyl oblysynyń ákimi Asqar Myrzahmetov qalanyń osy bóligin aralap, olardyń ıelerimen áńgimelesti. Óńir basshysy jaýapty vedomstvolarǵa Áýlıeata kezeńindegi ǵımarattardy qalpyna keltirýge jumsalatyn qarjyny eseptep, jobany júzege asyratyn baǵdarlama ázirleýdi tapsyrdy. Oryndaý merzimi - bir aı.
«Obelısk» qoǵamdyq birlestigi usynǵan taǵy bir usynysty jergilikti bılik qoldady. Ol - Turar Rysqulov atyndaǵy saıabaqta «keńes kezeńindegi park» salý.
Aıta keteıik, Tarazda jyl basynan beri ǵımarattar men saıabaqtardy qalpyna keltirý boıynsha aýqymdy jumys júrgizilip jatyr.
