Tarazda turǵyn úıdiń shatyry órtenip, 50 adam evakýatsııalandy
TARAZ. QazAqparat - Taraz qalasynda kópqabatty turǵyn úıdiń shatyry órtendi, dep habarlaıdy QazAqparat tilshisi.
Oqıǵa týraly Jambyl oblysy tótenshe jaǵdaılar departamentiniń baspasóz qyzmeti habarlady.
«Taraz qalasy Araı-2 aýdanynda ornalasqan kópqabatty úıdiń shatyrynda órt shyqqan. 15:06 shamasynda shuǵyl qyzmet telefonyna páterdiń birindegi balkonnyń janyp jatqany týraly habarlama kelip túsken. Jedel basqarý ortalyǵynyń dıspetcheri órtke qarsy qyzmet garnızonynyń shyǵý kestesine sáıkes oqıǵa ornyna dereý kúsh-quraldardy jóneltti» delingen vedomstvo habarlamasynda.
Tilsiz jaýdy aýyzdyqtaýǵa jeke quramnan 10 tehnıka jáne órt sóndirý qyzmeti bólimshelerinen 42 adam jumyldyrylǵan.
Sondaı-aq órt oqıǵasy oryn alǵan aýmaqta jedel-qutqarý qyzmetinen 4 qyzmetker men bir tehnıka, medıtsınalyq apattar ortalyǵy fılıalynan 3 adam jáne 1 tehnıka jumys istedi.
Oqıǵa ornynan 50 adam qaýipsiz orynǵa kóshirildi. Onyń ishinde 15-i - balalar.
Órt sóndirýshilerdiń shapshań ári uıymdasa atqarǵan áreketiniń arqasynda órt nebári 29 mınýtta joıyldy. Qyzy jalyn 60 sharshy metr aýmaqty sharpydy.
Órttiń shyǵý sebebi anyqtalyp jatyr.
