Tarazda turǵyn úı salý úshin jer kezeginde 69 700 adam tur
Qazirgi tańda Taraz qalasynyń jalpy aýmaǵy - 18787 gektar. Halyq sany 356 myń adamdy quraıdy. Osydan segiz jyl buryn 338 myń adam bolǵan desek, jalpy ósim - 28 myń. Al, jobalaý esebi boıynsha halyq sanyn 2015 jyly 400 myńǵa jetkizý kózdelgenimen, ol oryndalmady. 1263 kópqabatty turǵyn úıler bar desek, onyń 151-i - bir qabatty barak úıler. Sondaı-aq, 43261 az qabatty jeke turǵyn úı bar.
Taraz qalasy ákiminiń orynbasary Saılaýǵaly Baınazarov qazirgi tańda shahar boıynsha jeke turǵyn úı qurylysyn salý úshin jer kezeginde 69700 adam turǵanyn tilge tıek etti. Ol qala qurylysyna qolaıly aımaqtar retinde oblys ortalyǵyna taıaý Baızaq jáne Jambyl aýdandarynyń birqatar aýmaqtaryn atady. Qalaǵa jaqyn ornalasqan Baızaq aýdanynyń 4 eldi mekeni bolsa, onyń jer kólemi - 5474 gektar. Al Jambyl aýdanyndaǵy 10 eldi mekeniniń jer kólemi - 14313 gektardy quraıdy.
Basqosý barysynda jańa bas jospar qurý men egjeı-tegjeıli jospar qurýdaǵy 3 usynysty qabyldaý máseleleri kóterildi. 2019 jyldyń jumys josparyna qala mańy aýmaǵy jobasyn rezervtegi jerlerdi jeke qurylys júrgizýge arnalǵan tizimdi eskere otyryp jasaý kerektigi, qala ortalyǵyndaǵy az qabatty eski ǵımarattarǵa renovatsııa jasaý úshin jeke baǵdarlama qurý kerektigi aıtyldy.
Asqar Isabekuly konstıtýtsııalyq talaptarǵa sáıkes jer kezeginde adamdarǵa 10 sottyq jerdi oblystyń kez-kelgen aýmaǵynan berýge bolatynyn, bas jospardy stıhııalyq jaǵdaıǵa qarap jasaýǵa bolmaıtynyn basa aıtty. Qalanyń aınalasynda qurylysqa jaramsyz jerlerdi jasyl jelekti aýmaqqa aınaldyryp, qoldan aǵash otyrǵyzyp, orman jasaý kerektigin, ol jerlerden demalys oryndaryn ashýǵa bolatynyn tilge tıek etti.
Ǵıbrat Sembaı
