Tarazda turǵyndardyń mazasyn alǵan polıgrafııa 500 myń teńgeden ótemaqy tóleıdi
ASTANA. KAZINFORM — Taraz qalalyq soty eki turǵynnyń «A.» zańdy tulǵasynan moraldyq zııandy óteý týraly aryzyn qarady.
Taraz qalasyndaǵy bir turǵyn úıde uzaq ýaqyt boıy jarnamalyq jáne polıgrafııalyq ónimder shyǵarylǵan. Bul jumys turǵyn úıge arnalmaǵan edi. Jabdyq qatty shý shyǵarǵan, boıaýlardyń ıisi ótkir bolǵan jáne sanıtarlyq talaptar saqtalmaǵan. Osyǵan baılanysty kórshiler birneshe ret shaǵymdanǵan.
Tekserý kezinde ýákiletti organdar sanıtarııalyq-epıdemıologııalyq talaptar men órt qaýipsizdigi erejeleriniń buzylǵanyn anyqtady. Kásip ıesine zań buzýshylyqtardy joıý týraly nusqama berilgen, biraq ol ýaqytynda oryndalmaǵan. Bul nusqamalardyń zańdy ekeni ákimshilik sottyń kúshine engen sheshimimen rastalǵan.
Sottyń pikirinshe, jaýapkerdiń zańsyz áreketteri turǵyndardyń quqyqtaryn buzǵan, olarǵa moraldyq zııan keltirgen jáne ómir súrý jaǵdaıyn nasharlatqan. Sonyń saldarynan turǵyndar basqa jerge kóshýge májbúr bolǵan.
— Sot sheshimimen zańdy tulǵa ár talap qoıýshyǵa 500 myń teńgeden moraldyq zııan ótemaqysyn, sondaı-aq sot shyǵyndaryn tóleýge mindetteldi.
Bul sheshim zańdy kúshine endi, — delingen habarlamada.
Budan buryn Taraz turǵyndary jańa kópir úshin úıleri men kásiporyndaryn buzýǵa ruqsat bermeı otyrǵanyn jazǵan edik.
