Tarazda turǵyn úıdi jóndeýge bólingen 59 mln teńgeni jymqyryp qoıǵan
TARAZ. KAZINFORM — Taraz qalasynyń prokýratýrasy «T» JShS qyzmetin tekserý barysynda kóppáterli turǵyn úıdiń ortaq múlkine kúrdeli jóndeý júrgizý úshin jasalǵan tórtjaqty kelisimshartta turǵyndardyń qoltańbalarynyń qoldan jasalǵanyn anyqtady.
Qoldanystaǵy zańnamaǵa sáıkes kondomınıým nysanynyń ortaq múlkine kúrdeli jóndeý júrgizýge merdiger uıymdy tańdaý úı keńesiniń quzyretine jatady.
Alaıda bul jaǵdaıda turǵyndarǵa merdigerdi tańdaýǵa múmkindik berilmeı, olardyń qoltańbalary qoldan jasalǵan.
— Shilde aıynda Taraz qalasy prokýratýrasynyń nusqaýymen bul derek QK-niń 385-baby 1-bóligi boıynsha Taraz qalasy PB-nyń SDTBT-na tirkelip, sotqa deıingi tergep-tekserý bastaldy.
Sonymen qatar seriktestik qyzmetin tekserý nátıjesinde, 2025 jyly mamyr aıynda turǵyn úı-kommýnaldyq sharýashylyǵyn jańǵyrtýǵa bólingen 59 mln teńge kóleminde bıýdjet qarajatyn negizsiz jumsaý faktisi boıynsha QK-niń 189-baby 4-bóligimen qylmystyq is tirkeldi, — delingen Jambyl oblysynyń prokýratýrasy habarlamasynda.
Atalǵan qylmystyq isti tergeý Jambyl oblysy boıynsha Ekonomıkalyq tergep-tekserý departamentine tapsyryldy.
QPK-niń 201-babyna sáıkes ózge aqparat jarııa etýge jatpaıdy.
Aıta ketelik «SQ-Farmatsııa» qarjy jymqyrý kúdigine iligip, sotqa deıingi tergeý amaly bastalǵan edi.