Tarazda túnde taksı júrgizýshisin uryp, tonap ketken jolaýshylar ustaldy
TARAZ. QazAqparat –Taraz qalasynda túngi ýaqytta taksı júrgizýshisin soqqyǵa jyǵyp, tonap ketken 32 jáne 29 jastaǵy turǵyndar qolǵa tústi, - dep habarlaıdy QazAqparat tilshisi.
Jeke kólikpen adam tasýmen aınalysatyn Taraz qalasynyń 25 jastaǵy turǵyny keshki saǵat 19.30-da qala ortalyǵynan eki adamdy Qant zaýyty aýdanyna aparýǵa kelisedi. Mejelengen jerge, ıaǵnı jaryqsyz jáne adam kóp júrmeıtin kóshe kelgende jolaýshylar júrgizýshini kólikten shyǵaryp, jerge qulatyp, ura bastaǵan. Jábirlenýshige qarsylyq kórsetýge múmkindik bermeı, bireýi - sporttyq bıtamen (saqa), ekinshisi judyryqpen soqqylaǵan. Jábirlenýshiniń jeke múlkin alyp, qaskúnemder oqıǵa ornynan boı tasalaǵan. Bul týraly oblystyq polıtsııa departamentiniń baspasóz qyzmeti habarlady.
«Atalǵan derekke qatysty QR QK 191-babynyń 2-bóligi (tonaý) boıynsha sotqa deıingi tergeý amaldary bastaldy, jeke múlki jábirlenýshige qaıtaryldy. Kúdiktilerge qatysty Jambyl oblysynyń Mamandandyrylǵan tergeý soty kúzetpen ustaý túrindegi bultartpaý sharasyn sanktsııalady. Kúdiktilerdiń biri osyǵan uqsas qylmys jasaǵany úshin buryn birneshe ret sotty bolǵan»,-delingen vedomstvo habarlamasynda.
Taraz qalalyq polıtsııa basqarmasy jeke tasymaldaýmen aınalysatyn júrgizýshilerdi qala syrtyna eki jáne odan da kóp adamdy jetkizý kezinde qyraǵy bolýǵa shaqyrady.
