Tarazda transfýzııalyq medıtsına boıynsha halyqaralyq konferentsııa ótedi
TARAZ. QazAqparat – Taraz qalasynda 13-14 qyrkúıek kúnderi «Transfýzııalyq medıtsınanyń ózekti máseleleri» atty Halyqaralyq ǵylymı-tájirıbelik konferentsııa ótedi. Oǵan Qazaqstannyń ǵylymı-zertteý uıymdary men memlekettik organdarynyń basshylary jáne Reseı, Ýkraına, Belarýs, Tájikstan, Ózbekstan, Qyrǵyz Respýblıkasy taǵy basqa elderdiń transfýzıologııa salasyndaǵy sarapshylary qatysady dep kútilýde, dep habarlaıdy QazAqparat.
Halyqaralyq konferentsııanyń keń aýqymdy ǵylymı baǵdarlamasynda 30-dan astam baıandama oqylyp, Qazaqstandyq mamandarǵa transfýzııalyq medıtsına salasyndaǵy kóptegen qyzyqty habarlamalardy tyńdaýǵa jáne túrli jaǵdaılardy talqylaýǵa múmkindik bermek. Bul týraly «Óńirlik kommýnıkatsııalar qyzmetiniń» aqparat alańynda ótken baspasóz konferentsııasynda aıtyldy. Onda spıkerler QR Densaýlyq saqtaý mınıstrligi Transfýzıologııa ǵylymı-óndiristik ortalyǵynyń dırektory Sanııa Abdrahmanova, medıtsına ǵylymdarynyń doktory, professor, «N. I. Pırogov atyndaǵy Ulttyq medıtsınalyq-hırýrgııalyq ortalyqtyń» Reseı Federatsııasyna eńbegi sińgen ónertapqyshy Jıbýrt Evgenı, atalǵan ǵylymı-óndiristik ortalyǵynyń sapasyn baqylaý jáne aımaqtarmen jumys jónindegi basshysy Natalıa Tarasova jáne Jambyl oblystyq qan ortalyǵynyń dırektory Gýlam Ýmarov atalmysh eki kúndik halyqaralyq konferentsııanyń mańyzdylyǵy týraly baıandap, jýrnalısterdiń suraqtaryna jaýap berdi.
Aýqymdy sharany QR Densaýlyq saqtaý mınıstrliginiń Transfýzıologııa ǵylymı-óndiristik ortalyǵy «Eýrazııalyq Medıtsınalyq qaýymdastyǵy» nysanyndaǵy zańdy tulǵalar birlestigi men Jambyl oblystyq qan ortalyǵy birlese uıymdastyrýda.
«Konferentsııa ózekti máselelerdi talqylaý úshin álemniń túrli elderinen jınalatyn transfýzıologııanyń jetekshi mamandarynyń tájirıbe almasý alańyna aınalady. Negizgi maqsat – donorlyqty damytý, qan qyzmetiniń ınnovatsııalyq baǵyttarynda halyqaralyq yntymaqtastyqty arttyrý jáne qan quıý salasynda úzdik tájirıbeni engizý»,- deıdi Gýlam Ýmarov.
Al, Transfýzıologııa ǵylymı-óndiristik ortalyǵynyń dırektory Sanııa Abdrahmanovanyń aıtýynsha, transfýzıologııanyń jekelegen problemalyq máselelerin talqylaý qajettiligi, praktıkalyq tájirıbe almasýdyń mańyzdylyǵy jáne halyqqa transfýzıologııalyq kómek kórsetý standartyn engizý tıimdiligi monıtorınginiń nátıjeleri Qazaqstanǵa transfýzııalyq ınfektsııalarǵa donorlyq qandy zerthanalyq dıagnostıkalaý salasynda halyqaralyq standartty engizýge múmkindik berýde eken. Ol donorlyq qannyń ınfektsııalyq qaýipsizdiginiń eń mańyzdy elementteriniń biri jatatyn kórinedi.
Óz kezeginde Transfýzıologııa ǵylymı-óndiristik ortalyǵynyń sapany baqylaý jáne aımaqtarmen jumys basqarmasynyń bastyǵy Natalıa Tarasova transfýzııalyq terapııanyń ımmýnogematologııalyq qaýipsizdigin qamtamasyz etý máselelerine toqtaldy.
Aıta keteıik, konferentsııa barysynda klınıkalyq transfýzıologııa, óndiristik transfýzıologııanyń ózekti máseleleri, qan qyzmetindegi aqparattyq tehnologııalar jáne transfýzııalyq medıtsınadaǵy Zerthanalyq dıagnostıka baǵyttary boıynsha úsh sektsııa jumys jasamaq.
