Tarazda tótenshe jaǵdaı rejımin buzǵan mas júrgizýshiler qamaýǵa alyndy
TARAZ. QazAqparat – Taraz qalalyq polıtsııa basqarmasy patrýldik polıtsııa batalonynyń qyzmetkerleri oblys ortalyǵynyń ártúrli aýdandarynda mas kúıinde kólik tizgindegen úsh júrgizýshini ustady, - dep habarlaıdy QazAqparat.
Tártip buzýshylar tótenshe jaǵdaı rejımine qaramastan, qozǵalysqa salynǵan shekteýlerdi elemeı, sonymen qatar kólik quraldaryn mas kúıinde basqarǵan. Bul týraly oblystyq polıtsııa departamentiniń baspasóz qyzmeti habarlady.
«BMW» jáne «Mazda» avtokólikteriniń júrgizýshilerine qatysty QR ÁQBtK-niń 608-baby 1-bóligi boıynsha hattamalar jasaldy. «Chevrolet» markaly avtokóligin basqarǵan úshinshi buzýshy QR ÁQBtK-niń 608-babynyń 6-bóligimen ákimshilik jaýapqa tartyldy»,-delingen vedomstvo habarlamasynda.
Іs materıaldaryna sáıkes, sot «BMW» jáne «Mazda» avtokólikteriniń júrgizýshilerin 15 táýlikke qamaýǵa alý jáne 7 jylǵa kólik júrgizý quqyǵynan aıyrýǵa úkim shyǵardy. Al, «Chevrolet» markaly avtokóliginiń júrgizýshisine 20 táýliktik qamaý túrindegi ákimshilik jaza taǵaıyndaldy.
Jambyl oblysynyń polıtsııa departamenti karantın kezinde adamdardyń jáne jeke kóliktiń Taraz qalasynyń aýmaǵynda erkin júrip-turýyna tyıym salynǵandyǵyn eskertedi. Tótenshe jaǵdaı rejımi men karantın talaptaryna baǵynbaǵany úshin tártip buzýshylar zańǵa sáıkes jazalanatyndyǵyn jetkizdi.
