Tarazda tórt úı paıdalanýǵa berilmeı qalýy múmkin
TARAZ. KAZINFORM – Bıyl Jambyl oblysynda 102 kóppáterli turǵyn úıdiń qurylysy júrgizilip jatyr.
Jyl basynan beri memlekettik bıýdjet esebinen 10 úı jáne ınvestorlardyń jeke qarajaty esebinen 14 turǵyn úı paıdalanýǵa berildi. Endi qurylysy júrip jatqan qalǵan 78 kóppáterli turǵyn úıdiń 56-sy memlekettik bıýdjet esebinen, 22-si ınvestorlar men kásipkerlerdiń jeke qarajaty esebinen salynýda.
Jospar boıynsha 55 kóppáterli turǵyn úıdiń qurylysy bıyl aıaqtalyp, paıdalanýǵa berilýi tıis. Alaıda 4 kóppáterli turǵyn úıdiń qurylysy aıaqtalmaı, paıdalanýǵa berilmeı qalý qaýpi bar.
«Mysaly, Taraz qalasy Súleımenov kóshesi sońyndaǵy turǵyn alqaptaǵy 80 páterli turǵyn úıdiń qurylysy jumystary 15 paıyz ǵana oryndalyp, toqtap tur. Osy úıdi salyp jatqan «VILENA» JShS Taraz qalalyq mamandandyrylǵan ákimshilik sotynyń sheshimimen josyqsyz dep tanylyp, kelisimshart birjaqty buzyldy. Sondaı-aq «Taraz qalasy 15 móltek aýdanynda 2 kóppáterli turǵyn úı qurylysyn keshiktirgeni úshin «PMK-109» JShS-in de aıyppul tóletý jáne josyqsyz merdiger retinde taný boıynsha Taraz qalalyq mamandandyrylǵan ákimshilik sotyna talap-aryz berildi. Jáne osy 15 móltek aýdandaǵy taǵy da bir kóppáterli turǵyn úı qurylysyn qolǵa alǵan «Ernurjanqurylys-2010» JShS-in de josyqsyz retinde taný týraly sotqa materıaldar ázirlenýde. Dál qazir bul úıdiń qurylysynyń 70 paıyzy ǵana oryndalǵan. Nysan basynda qurylysshylar sany óte az, óndiristik kesteden keshigýde», - deıdi Jambyl oblystyq Memlekettik sáýlet-qurylys baqylaý basqarmasynyń basshysy Qaırat Bısembaev.
Taǵy bir aıtary, osy kóppáterli turǵyn úılerdiń qurylysyna qatysty 6 jospardan tys tekserý jumystary júrgizilip, barlyǵyna 345 000 men 1 932 000 teńge aralyǵynda ákimshilik aıyppul salyndy. Sondaı-aq keıbir tehnıkalyq qadaǵalaýshynyń qoldanystaǵy attestaty 6 aı merzimge toqtatyldy.
