Tarazda TikTok-ta otyryp kólik aıdaǵan júrgizýshi jaýapqa tartyldy

ASTANA. KAZINFORM — Áleýmettik jelilerge jasalǵan monıtorıngten keıin jambyldyq júrgizýshi ustaldy.

Jambyl oblysy polıtsııa departamentiniń habarlaýynsha, qoǵamdyq tártip pen jol qaýipsizdigin buzý faktilerin anyqtaý maqsatynda áleýmettik jelilerge monıtorıng júrgizý barysynda ákimshilik polıtsııa qyzmetkerleri TikTok jelisinde tikeleı efırde otyryp, jol erejesin buzýshyny anyqtady.

— Kólik tizgindegen jas jigit tikeleı efırde alkogoldik ishimdik iship, balaǵat sózder aıtqan. Artynsha aldyńǵy nómirin sheship alyp, qalany aralap shyqqan. Beınebaqylaý kameralarynyń kómegimen polıtsııa qyzmetkerleri Mercedes-Benz kóliginiń júrgizýshisin anyqtady,- dedi vedomstvonyń baspasóz qyzmeti.

24 jastaǵy júrgizýshige kólikti memlekettik tirkeý nómirinsiz, saqtandyrý polısinsiz júrgizgeni jáne jol erejesin buzǵany úshin ákimshilik hattama toltyryldy.

- Kólikti mas kúıde júrgizgen taǵy bir júrgizýshige hattama toltyryldy. Tártip buzýshy 7 jylǵa kólik júrgizý quqyǵynan aıyrylyp, 15 táýlikke ákimshilik qamaýǵa alynady jáne qomaqty aıyppul tóleıdi, - delingen vedomstvo málimdemesinde.

Kólik mamandandyrylǵan avtoturaqqa qoıyldy.

Buǵan deıin Tarazda birneshe aıdyń ishinde 2 mıllıon 457 myń 350 teńgege 54 ret jyldamdyqty buzǵan 31 jastaǵy júrgizýshi ustalǵan.

Quqyq qorǵaý organynyń málimetinshe, 2023 jyldyń 12 aıynda Jambyl oblysynda belgilengen jyldamdyqty asyrǵany úshin 22,5 myńnan astam júrgizýshi ákimshilik jaýapkershilikke tartylǵan.