Tarazda tek bir ǵana emhana óz qýattylyǵy sheginde jumys istep keledi

TARAZ. KAZINFORM – Jaǵdaıdy túzetý úshin mamandar dárigerlerge túsetin júktemeni jáne tirkelgen naýqastar sanyn qaıta qaraýdy usynady, dep habarlaıdy Kazinform agenttiginiń tilshisi.

Ótken jyldyń kórsetkishterin taldaý nátıjesinde Jambyl oblysy boıynsha barlyq ambýlatorııalyq-emhanalyq uıymdardyń jalpy aǵymdaǵy qýattylyǵy bir aýysymda 12 146 adamdy quraıtyny anyqtalǵan.

Osy jyldyń basynda oblysta statsıonarlyq kómek kórsetetin 56 densaýlyq saqtaý uıymy jumys istep turǵan. Olardaǵy tósek qory — 6 087 oryn.

Eń úlken júkteme oblys ortalyǵyndaǵy qalalyq emhanalarǵa túsedi. Aýdıtorlyq tekserý barysynda alty memlekettik emhananyń tek bireýi ǵana óz qýattylyǵy sheginde jumys isteıtini anyqtalǵan.

Sonymen qatar óńirde aýrýhanaǵa jatqyzý kórsetkishi 8,8%-ǵa ósken. Mamandardyń aıtýynsha, bul ambýlatorııalyq qyzmettiń tıimdiligi tómen ekenin jáne profılaktıkalyq jumystyń álsizdigin kórsetedi.

Medıtsınalyq tehnıkalardyń eskiligi de qosymsha másele bolyp qalyp otyr. Óńirdegi jabdyqpen qamtylý deńgeıi — 77,8%, al ortasha tozý kórsetkishi — 38,8%. Jańa qural-jabdyqtar qoldanystaǵylary eskirgen boıda kelip túspeıdi, bul materıaldyq-tehnıkalyq bazany sapaly jańartýǵa múmkindik bermeı otyr.

Osy faktorlardyń jıyntyǵy densaýlyq saqtaý júıesiniń negizgi kórsetkishi — ólim-jitim deńgeıine áser etip otyr. Ótken jyly bul kórsetkish ár 1 000 adamǵa shaqqanda 6,11-di qurap, 2022 jylmen salystyrǵanda 2,2%-ǵa artqan. Sol kezeńde náreste ólimi 18,9%-ǵa, al ana ólimi 12,7%-ǵa kóbeıgen.

Aıta keteıik, Jambyl oblysynda 730 oqýshy der kezinde medıtsınalyq tekserýden ótpegeni anyqtaldy.

Sondaı-aq Jambyl oblysynda alty jasar bala josparly em qabyldaý kezinde qaıtys bolǵanyn habarlaǵanbyz.