Tarazda tehnogendik sıpattaǵy tótenshe jaǵdaı jarııalandy

TARAZ. QazAqparat – Maýsym aıynda Taraz qalasyndaǵy kóppáterli turǵyn úılerdiń birinde órt bolǵan edi. Endi sodan bolǵan zalaldy ótep, órt saldaryn joıý úshin shahar aýmaǵynda tehnogendik sıpattaǵy tótenshe jaǵdaı jarııalandy, dep habarlaıdy QazAqparat tilshisi.

«Taraz qalasynyń tótenshe jaǵdaılardyń aldyn alý jáne joıý jónindegi komıssııanyń 2023 jylǵy 26 maýsymyndaǵy №4 hattamasynyń negizinde, Taraz qalasy Abaı dańǵyly, №170 kóppáterli turǵyn úıde órt shyǵýyna baılanysty turǵyndardyń tynys-tirshiligin qamtamasyz etý maqsatynda Taraz qalasynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn. Tótenshe jaǵdaıdy joıý basshysy bolyp Taraz qalasy ákiminiń orynbasary N.Qaldybaev taǵaıyndalsyn jáne oǵan osy sheshimnen týyndaıtyn is-sharalardy júrgizý tapsyrylsyn», - delingen Taraz qalasynyń ákimi Baqytjan Orynbekov qol qoıǵan sheshimde.

Tótenshe jaǵdaı jarııalaýǵa baǵyttalǵan qujat alǵash jarııalanǵan kúnnen, ıaǵnı 21 shildeden bastap kúshine endi.