Tarazda táýligine 80 tonna sút óńdeıtin zaýyt iske qosyldy
Táýelsizdik kúni oblys ortalyǵyndaǵy «Kókjıek - 2030» jaýapkershiligi shekteýli seriktestiginiń sút óńdeıtin jáne tolyǵymen avtomattandyrylǵan tsıfrly basqarý júıesi engizilgen zaýyty iske qosyldy. Kásiporynnyń ashylý saltanatyna oblys ákiminiń orynbasary Murathan Shúkeev, oblystyq ardagerler keńesiniń tóraǵasy Erkinbek Soltybaev, sondaı-aq oblys ákimdigi aýyl sharýashylyǵy basqarmasynyń basshysy Berik Nyǵmashev qatysty.
Aıta ketý kerek, 2007 jyly qurylyp, sút ónimderin óndirýmen aınalysa bastaǵan óndiris orny aǵymdaǵy jyly qaıta keńeıtilip, modernızatsııalandy. Eńbek ónimdiligin arttyrý maqsatynda Italııadan jetkizilgen sońǵy úlgidegi tehnologııalarmen jaraqtandyryldy. Jobanyń jalpy quny - 1,6 mıllıard teńge. Zaýyttyń qýattylyǵy - kúnine 50 tonna sút ónimin óndirýge jetedi. Al qajetti shıkizat Jýaly, Jambyl, Baızaq, T.Rysqulov aýdandarynan jáne Túrkistan oblysynan jetkizilip jatyr.
Kásiporyn dırektory Ábdiǵalı Begimbetov búgingi tańda sút baǵytyndaǵy 4 aýyl sharýashylyǵy kooperatıvimen birlese jumys júrgizip jatqanyn, aldaǵy ýaqytta kooperatıvter sanyn 10-ǵa jetkizýdi josparlap otyrǵanyn tilge tıek etti. Atalǵan zaýyt óndirgen ónim kólemi sońǵy 5 jylda 186,2 mıllıon teńgeden 774, 3 mıllıon teńgege deıin ósip, turaqty jumysshylar sany 32-den 47-ge artypty.
Jańa kásiporynnyń ashylý rásiminde oblys ákiminiń orynbasary Murathan Shúkeev jurtshylyqty Táýelsizdik kúnimen quttyqtap, óńirdegi aýyl sharýashylyǵy salasynda atqarylǵan ilkimdi isterge toqtaldy.
«Elbasymyz Nursultan Ábishuly bıylǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda agroónerkásip kesheniniń áleýetin arttyrý maqsatynda aldymyzǵa naqty mindetter qoıdy. Memleket basshysynyń tapsyrmasyna saı oblysymyzda júıeli jumystar júrgizilýde. Máselen, sút jáne et ónimderin tereńdete óńdeýge jáne óndiris oryndaryn tsıfrlandyrýǵa erekshe kóńil bólinýde. Tolyqtaı tsıfrlandyrylǵan «Kókjıek - 2030» jaýapkershiligi shekteýli seriktestigi zaýytynyń iske qosylýy osy sózimizdiń aıǵaǵy. Jalpy, oblysymyzda sút ónimderin óndiretin 18 kásiporyn jumys istep tur. Aldaǵy ýaqytta da bul baǵyttaǵy jumystar kezeń-kezeńimen júzege asyryla bermek», - dedi Murathan Júnisáliuly.
