Tarazda «Taraz tour» mobıldik qosymshasy iske qosyldy
TARAZ. QazAqparat - Taraz qalasyndaǵy Qarahan kesenesiniń mańynda «Taraz tour» mobıldik qosymshasynyń tusaýy kesildi, dep habarlaıdy QazAqparat.
«Tsıfrlyq Qazaqstan» baǵdarlamasy aıasynda iske qosylǵan zamanaýı qosymsha arqyly kez kelgen týrıst óńirdegi tarıhı-mádenı nysandar men kıeli oryndarǵa barǵan kezde barlyq qajetti aqparatqa esh adamnyń kómeginsiz-aq qol jetkize alady. Ol úshin týrıst smartfonyndaǵy «play market» qosymshasy arqyly «Taraz tour» mobıldik qosymshasyn júktep, tarıhı-mádenı nysan aldyndaǵy tasta kórsetilgen QR-kodqa qoıýýy kerek. Sol zamatta-aq tolyqqandy aqparat ekranǵa ózi shyǵa keledi eken.
Mobıldik qosymshany tanystyrǵan oblystyq týrızm basqarmasynyń basshysy Qarlyǵash Aralbekova mundaı «QR-kod» óńirdegi ózge de 20 nysanǵa ornatylǵanyn aıtty. Sonymen qatar smartfondy VR kózildiriktiń ishine qondyryp, vırtýaldy beıneni jaqyndatyp, nysan týraly aqparatty tolyqqandy alý múmkindigi de qarastyrylǵan eken. Tipti bul mobıldi qosymshany oflaın rejimde de qoldanýǵa bolatyn kórinedi. Al AR arqyly málimetti tarıhı tulǵalardyń beınesimen kórýge jaǵdaı jasalǵan. Budan bólek, navıgatorǵa kıeli jerlerge jetý múmkindikteri arnaıy baǵyttarmen kórsetilgen. Sol arqyly ınternettiń kómegimen kartaǵa qaraı otyryp, nysandy izdegen adam eshkimge júginbesten ózi jete alady.
Ǵıbrat Sembaı
