Tarazda tanymal ánshi jol qozǵalysy erejesin óreskel buzǵany úshin aıyppul tóledi
ASTANA. KAZINFORM – Áleýmettik jelige júrgizilgen monıtorıng barysynda polıtsııa Taraz qalasynda jol qozǵalysy erejelerin buzý faktisi beınelengen vıdeony anyqtady. Atalǵan beınejazba qazaqstandyq ánshi Ernar Aıdardyń áleýmettik jelidegi paraqshasynda jarııalanǵan.
Polıtsııanyń málimetinshe, beınejazbada jol qozǵalysy erejeleri talaptaryn demonstratıvti túrde elemeý faktileri kórinis tapqan. Avtokólik ıesi anyqtalyp, QR Ákimshilik quqyq buzýshylyq týraly kodeksiniń úsh birdeı baby boıynsha ákimshilik jaýapkershilikke tartylǵan.
Atap aıtqanda, júrgizýshi kólik quraldaryn toqtatý nemese qoıý qaǵıdalaryn buzǵany úshin QR ÁQBtK-niń 597-babynyń 1-bóligi boıynsha jaýapqa tartyldy. Bul quqyqbuzýshylyq úshin 5 aılyq eseptik kórsetkish mólsherinde aıyppul kózdelgen.
Sonymen qatar ol joldy belgilenbegen jerden ótkeni úshin QR ÁQBtK-niń 615-baby boıynsha da jaýapqa tartylǵan. Atalǵan bapqa sáıkes aıyppul mólsheri 2 aılyq eseptik kórsetkishti quraıdy.
Budan bólek, jol belgileri men jol tańbalarynyń talaptaryn saqtamaǵany úshin QR ÁQBtK-niń 601-baby qoldanyldy. Bul quqyqbuzýshylyq úshin 3 aılyq eseptik kórsetkish kóleminde aıyppul salý qarastyrylǵan.
Polıtsııa jalpy aıyppul somasyn naqtylamaǵanymen, kórsetilgen baptar boıynsha belgilengen sanktsııalardy eskere otyryp, aıyppuldyń jalpy kólemi 43 250 teńgeni quraýy tıis.
Aıta keteıik, buǵan deıin Astanada mas kúıinde kólik júrgizgen sýdıa qyzmetinen bosatyldy.