Tarazda tandyr nannan shege shyqty
TARAZ. QazAqparat – Taraz qalasynda tandyr nannan shege shyǵyp, jergilikti turǵyndardyń jaǵasyn ustatty, dep habarlaıdy QazAqparat tilshisi.
Taraz qalasy «Myńbulaq» shaǵyn aýdanynyń turǵyny Laýra Azatbekova úı mańyndaǵy dúkennen ádettegideı nan alyp keledi. Túski as ishýge qamdanǵanda, tandyr nannyń ortasynan shyqqan shegeni baıqaıdy. Mundaı jaǵdaı bolady dep oılamaǵan turǵyn bul kórinisti dereý beınekameraǵa túsiredi.
«Balalar úıde bolmaı qaldy. Áıtpese, olar nandy tistep jegende ne bolatyn edi?! Endi sanepıdqadaǵalaý mekemesi mundaı oqıǵalardy boldyrmaý úshin bárin qarap, tekserip shyqsyn», - deıdi ol.
Atalmysh dúkenge nan jetkizýshi naýbaıhana shahardaǵy burynǵy kók bazar mańyndaǵy eski saraıda ornalasqany belgili boldy.
«Biz tek shaǵymdanýshylardyń aryzy boıynsha ǵana tekseris júrgize alamyz. Shaǵymǵa baılanysty jospardan tys tekseris kezinde nysanda kemshilikter anyqtalyp jatsa, Ákimshilik quqyq buzý týraly kodekstiń 425-baby, 1-bólimi boıynsha hattama toltyrylyp, aıyppul salynady. Sondaı-aq kemshilikterdi joıý týraly nusqama beriledi»,- deıdi Jambyl oblystyq qoǵamdyq densaýlyq saqtaý departamentiniń taǵam obektilerin sanıtarlyq-gıgıenalyq qadaǵalaý bóliminiń basshysy Maǵfýza Davılova.
Alaıda, ol jergilikti tıisti mekemeler kásipkerlerge tikeleı tekseris júrgizýge dármensiz ekenin aıtady. Ol úshin elimizdegi jeke kásipkerlikti qorǵaıtyn zań boıynsha prokýratýranyń arnaıy ruqsaty qajet.
