Tarazda tamyzdan bastap avtobýstarǵa elektrondy bılet engiziledi
TARAZ. QazAqparat – 1 tamyzdan bastap Tarazdaǵy avtobýstardyń salondaryna elektrondyq jol júrý kartasy arqyly tólem jasaýǵa arnalǵan valıdatorlar men termınaldar kezeń-kezeńimen ornatylatyn bolady, dep habarlaıdy QazAqparat tilshisi.
Qala aýmaǵyndaǵy qoǵamdyq kólikterde jol júrý úshin elektrondyq karta arqyly tóleý kezinde jol aqysy barlyq jolaýshylar úshin 65 teńge, mektep oqýshylaryna (1-11 synyp) - 30 teńge. Al, elektrondyq kartasy joq azamattar jol aqysyn qolma-qol aqshamen tóleıtin bolsa, jol júrý quny barlyq jolaýshylar úshin 130 teńge, mektep oqýshylaryna (1-11 synyp) 65 teńge mólsherinde bolmaq. Bul týraly Taraz qalasynyń ákimdigi habarlady.
«SAPARCARD» elektrondyq jol júrý tólem kartalaryn 2020 jyldyń 27 shildesinen bastap qaladaǵy birneshe núkteden satyp alýǵa bolady. Elektrondyq jol júrý tólem kartasynyń quny barlyq jolaýshylar úshin 500 teńge bolmaq.
Aıta ketý kerek, kartalardyń jaramdylyq merzimi shektelmegen. Sondaı-aq, oqýshylarǵa aty-jóni, JSN, fotosýreti bar personaldy kartalar daıyndalady», delingen qala ákimdiginiń habarlamasynda.
