Tarazda syrtqy jarnama retke keltirilip jatyr
TARAZ. QazAqparat - Qala ákimdigi uıymdastyrǵan arnaıy komıssııa reıd júrgizý barysynda Tarazdyń ınfraqurylymdyq jaǵdaıyn tekserip jatyr, dep habarlaıdy QazAqparat tilshisi qala ákimdiginiń baspasóz qyzmetine silteme jasap.
«Búginde oblys ortalyǵynyń syrtqy kórinisi qala bıliginiń basty nazarynda. Sonyń ishinde, qalanyń syrtqy kelbetine nuqsan keltirip turǵan syrtqy jarnamalardyń ahýaly da qaralyp jatyr. Qala ákimdiginiń janynan qurylǵan arnaıy komıssııa úsh baǵyt - til týraly zańnyń saqtalýy, jarnama, qurylys normalary men nysandardy ornalastyrý baǵyttary boıynsha jumys istep jatyr. Komıssııanyń quramynda ishki saıasat bólimi, mádenıet, tilderdi damytý, sáýlet, memlekettik kirister, jer qatynastary basqarmalary, BAQ ókilderi bar», - dedi qala ákimdigi baspasóz qyzmetiniń basshysy Gúlbahram Dúısekova.
Reıd barysynda anyqtalǵandaı, Tarazdaǵy kóptegen syrtqy jarnama nysandarynyń syrtqy kórinisi kóriksiz, saýattylyǵy men biryńǵaı ornalastyrý talaptary joq.
Taraz qalasynyń ákimi Ǵalymjan Ábdiraıymovtyń aıtýynsha, kóptegen kommertsııalyq nysandardyń ıeleri jarnama salasyndaǵy shekteýler týraly bilmeıdi.
«Syrtqy jarnamany ornalastyrýǵa ruqsat alýdan jáne onyń syrtqy kórinisin sáýlet jáne qala qurylysy bólimimen kelisýden bólek,aı saıyn syrtqy jarnama úshin salyq tóleý qajet. Alaıda, jeke kásipkerlerdiń eshqandaı ruqsat qujattary joq. Kóbi saýda nysandarynyń ıesi emes, jalǵa alyp otyrǵandaryn aıtýda. Qazir júzden astam jarnama nysandaryna demontaj jasadyq, 71-ine eskertý berdik. Mundaı tekserýler oblys ortalyǵynyń barlyq ýchaskelerinde udaıy júrgizilip otyrady», - dedi Taraz ákimi Ǵalymjan Ábdiraıymov.
Illıýstratsııalyq foto
