Tarazda sý tasqynynyń aldyn alý jumystary qyzý júrgizilýde
TARAZ. QazAqparat – Taraz qalasynda kóktemgi sý tasqyny qaýpin týyndatpas úshin gıdrotehnıkalyq qurylystardyń jaı-kúıin baqylaý jumystary júrgizilýde, dep habarlaıdy QazAqparat.
Aǵymdaǵy jyldyń aqpan aıynyń ekinshi jartysynda qalanyń drenajdyq júıesi tekserilip, Taraz qalasynyń ákimine aktiler jasalyp, qajetti tazartý jumystary týraly aqparat berilgen. Bul týraly Taraz qalasy tótenshe jaǵdaılar basqarmasynyń mamandary habarlady.
«Qala aýmaǵynda jalpy uzyndyǵy 80 shaqyrymnan asatyn segiz kanal bar. Bular: «Senkibaı», «Qapal», «Úshbulaq», «Qarasý-1», «Qarasý-2», «Tóregeldi», «Bazarbaı», «Túıte» kanaldary. Sonymen qatar «Shalǵaı Qarasý» jáne «Taıvan» turǵyn úı aýmaqtaryndaǵy uzyndyǵy 13 shaqyrym bolatyn eki drenajdyq kanaldar da eskerýsiz qalmaıdy. Qalanyń ırrıgatsııalyq aryqtarynyń uzyndyǵy 164 shaqyrymdy quraıdy. 500-den astam sý ótkizgish qubyrlary avtomobıl jáne temir joldary astymen ótedi. Munyń bári bizdiń nazarymyzda»,- deıdi TJB ofıtseri aǵa leıtenant Danııar Kelis.
Sondaı-aq, ol Taraz qalasynyń aýmaǵynda jer asty sýlarynyń kóterilýine jol bermeý maqsatynda merdiger uıymdarmen aǵymdaǵy jyldyń naýryz aıynan bastap drenajdyq kanaldardy tazartý jumystary bastalǵanyn jetkizdi. Ásirese, qaýipti sanalatyn «Taıvan» jáne «Shalǵaı Qarasý» aýdandary qatań baqylaýǵa alyndy.
